UCardoso uvume amaphutha bekhishwa kwiNedbank
ABADLALI beMamelodi Sundowns uNuno Santos (kwesokunxele) noBrayan Leon bejaha ukaputeni weTS Galaxy uMlungisi Mbunjana emdlalweni weNedbank Cup ngoMgqibelo.
Image: BACKPAGEPIX
UBONA bezenzele phansi ngokwenza amaphutha amakhulu ngesikhathi benqotshwa yiTS Galaxy ngo 2-0 emdlalweni weLast 16 weNedbank Cup ngoMgqibelo ntambama umqeqeshi weMamelodi Sundowns uMiguel Cardoso.
Lo mqeqeshi wenze izinguquko ezingu-10 eqenjini eliqale lo mdlalo obuseSolomon Mahlangu Stadium, KwaMhlanga.
Umdlali wasesiswini uNuno Santos uyena kuphela oqale lo mdlalo obewuqalile owamaphakathi nesonto webetway premiership ne-Orlando Pirates.
Kuyiwe ekhefini iRockets isivele ihamba phambili ngamagoli amabili. Elokuqala libekwe phakathi nguSiphamandla Ngwenya kulandela iphutha elenziwe nguDivine Lunga emuva, elesibili kwaba yiphenathi eshaywe nguJunior Zindoga.
Nakuba uCardoso ezenzile izinguquko esiwombeni sesibili kodwa iqembu lakhe lihlulekile ukuthola amagoli ebeliwadinga.
“Senze iphutha elibi siphasela umdlali wabo, bathola igoli lokuqala, saphinde sadala iphenathi ebingagwemeka. Akukho okunye okuningi engingakusho,” usho kanje uCardoso ekhuluma kwiSABC Sport ekupheleni komdlalo.
“Sibe nenqwaba yamathuba okushaya amagoli, amathuba acacile, kodwa sangawasebenzisa. Kufanele silivume icala ngalo mphumela. Asikwazi ukwenza amaphutha afana nalawa kulo mqhudelwano ngoba uma usuphumile ayikho indlela yokubuya. Sijeziswe ngamaphutha ethu.
“Bekuphoqa ukuthi siqalise abanye abadlali futhi ibingekho indlela yokuthi sisheshe sibafake laba abebesebhentshini. Noma kunjalo, besilindele ukuthi laba abaqalile babuqonde ubumqoka bomdlalo kodwa ngeshwa kubukeka sengathi abanye babo abawutholanga kahle umlayezo.
“Kumele siwamukele umphumela, sivume amaphutha, bese sidlulela phambili.”
ISundowns isizolungiselela umdlalo weBetway Premiership ezowudlala naMaZulu FC eMoses Mabhida Stadium ngoLwesibili ngo-7.30 ebusuku.