Izinkunzi engcupheni yokuphuma ekuseni kowase-Europe

UKUHLULEKA kwenqwaba yamaqembu anomlando omuhle kwi-UEFA Champions League ukuqeda kwiTop 8 kuwabeke engozini yokuthi asheshe awashiswe ijezi kulo mqhudelwano.

Emaqenjini ayisishiyagalombili aqede phezulu kwi-log ekupheleni kwesigaba samaqoqo, azibekisela indawo kwi-Last 16, kubalwa i-Arsenal eyinqobe yonke imidlalo yamaqoqo, iBayern Munich, Liverpool, Tottenham Hotspur, Barcelona, Chelsea, Sporting CP neManchester City.

Lokhu kuchaza ukuthi amaqembu aqede endaweni yesishiyagalolunye kuya kweka-24 asezobhekana nomqansa wokudlala umzuliswano okhethekile womkhumulajezi ozokhipha ayisishiyagalombili azoya kwi-Last 16.

La maqembu aqhathwe ekupheleni kwenyanga edlule, azobhekana ekhaya nasekuhambeni.

Kuwona kukhona iReal Madrid ephethe irekhodi lezicoco ezingu-15 zeChampions League, elinezicoco ezintathu i-Inter Milan, elinezimbili iJuventus, nompetha bangesizini edlule iParis Saint-Germain.

IMadrid yehlele endaweni yesishiyagalolunye ngemuva kokunqotshwa yiBenfica ngo 4-2 emdlalweni wokugcina wamaqoqo. Iphinde yaqhathwa nalo leli qembu kuma-playoff. 

Okunye okwenza lo mdlalo ubhekwe ngabomvu wukuthi leli qembu lasePortugal licijwa owayeqeqesha iMadrid, uJose Mourinho.

Inkakha yeMadrid esiyisikhulu kwezokuxhumana kuleli qembu, u-Emilio Butragueño, ibona umlenze wokuqala abazowudlala neBenfica ekuhambeni ngoLwesibili kuyiwona okufanele bawunqobe ukuze bazinciphisele umsebenzi ekhaya.

“Sibuyela eLisbon futhi. Kuyahlekisa ngoba sihlale iminyaka engu-60 singabhekani neBenfica, kodwa manje sesizodlala nabo kathathu esikhathini esingangenyanga. Sidinga umphumela omuhle ekuhambeni. Sibonile ukuthi kunzima kangakanani ukubhekana nabo enkundleni yabo,” kusho uButragueño kwi-website yeqembu.

“Ukwenza kahle emlenzeni wokuqala kumqoka ngoba ngikholwa wukuthi uma sesisekhaya eBernabéu sizokwazi ukuthola umphumela ozosifaka kwi-Last 16. Kufanele sidlalele ukunqoba ngoba siyiqembu elaziwa ngokudlala ibhola eliya phambili. Sinenqwaba yabadlali abahlaselayo abayingozi futhi kufanele sikusebenzise lokho.”

I-Inter Milan izobhekana neqembu laseNorway, iBodo/Glimt, elikhombisile esigabeni samaqoqo ukuthi liyingozi kangakanani ngesikhathi liqumba phansi iManchester City ngo 3-1.

Indlela yeJuventus ebheke kwi-Last 16 kufanele idlule eqenjini laseTurkey, iGalatasaray, kanti iPSG inenselelo yokukhipha elinye iqembu laseFrance, i-AS Monaco, ukuze iqhubeke nokuvikela isicoco sayo.

Imilenze yokuqala yama-playoff e-UEFA Champions League

NgoLwesibili: 7.45pm - Galatasaray v Juventus; 10pm - Dortmund v Atalanta, Monaco v Paris Saint-Germain, Benfica v Real Madrid.

NgoLwesithathu: 7.45pm - Qarabag FK v Newcastle; 10pm- Olympiacos v Leverkusen, Bodo/Glimt v Inter Milan, Club Brugge v Atletico Madrid.