Kubhede ekugcineni kwiChiefs iphuma koweCaf
UMDLALI weKaizer Chiefs uThabiso Monyane emakene noweZamalek u-Oday Dabbagh.
Image: BACKPAGEPIX
AMATHEMBA eKaizer Chiefs okudlulela esigabeni somkhumulajezi kwiCaf Confederation Cup ashabalale emdlalweni wokugcina wamaqoqo ngesikhathi inqotshwa yiZamalek yase-Egypt ngo 2-1 eSuez Canal Authority Stadium ngoMgqibelo ntambama.
AmaKhosi angene kulo mdlalo obusedolobheni i-Ismailia, e-Egypt eqhwakele kuGroup D futhi edinga iphuzu ukuze azibekisele indaweo kuma-quarterfinal.
Bekusalihambela kahle leli qembu lasePhefeni ngesikhathi kuyiwa ekhefini zibambene ngo 0-0.
Izinto ziqale ukushintsha ngasekuqaleni kwesiwombe sesibili iZamalek ithola igoli elishaywe nguJuan Bezerra, u-Abdallah El-Said wayishayela elesibili ngomzuzu ka-72.
UGlody Lilepo ubuyise ithemba kwbeChiefs elibeka phakathi ngekhanda sekusele imizuzu engu-15 umdlalo uphele, kodwa yahluleka ukuthola elokulinganisa.
Okukhiphe iChiefs kulo mqhudelwano wukuthi iqembu lase-Egypt eliqale umdlalo lisendaweni yesithathu kuGroup D, i-Al Masry, liqumbe phansi iZESCO United ngo 2-0.
IZamalek iqede esicongweni kuleli coco ngamaphuzu angu-11, yalandelwa yi-Al Masry ngamaphuzu angu-10.
Yize Amakhosi nawo eqede imidlalo yamaqoqo enamaphuzu angu-10 kodwa asale ngaphandle ngenxa yesibalo samagoli esingaphansi kwese-Al Masry.
IZESCO iqede emsileni ngamaphuzu amathathu ewathole idla iZamalek ngo 1-0 ngempelasonto edlule.