IDowns idlulele kumakota koweCaf igoba ezikaRhulani
UMGADLI weMamelodi Sundowns uBrayan Leon.
Image: BACKPAGEPIX
IMamelodi Sundowns izibekisele indawo kuma-quarterfinal e-Caf Champions League ngokunqoba iMC Alger yase-Algeria ngo 2-0 eLoftus Versfeld ngoMgqibelo ntambama.
Lo mdlalo ububhekwe ngabomvu ngenxa yokuthi i-Alger iphekwa ngowayeqeqesha iSundowns, uRhulani Mokwena.
Phakathi nesonto kuqubuke umsindo kuvela ukuthi amaBrazilian amise umhlaziyi uMario Masha, emsola ngokuputshuzela uMokwena amaqhinga eqembu.
Ekhuluma ngaphambi kwalo mdlalo ngoLwesihlanu, uMokwena uzichithile lezi zinsolo, ethi yena benoMasha bake baxoxa ngebhola kodwa hhayi amaqhinga asetshenziswa yiSundowns manje.
Amagoli amaSandawana ashaywe ngumgadli waseColombia ojoyine leli qembu ngoJanuwari, uBrayan Leon, ngasekuqaleni kwesiwombe sokuqala namaphakathi nesesibili.
Komunye umdlalo kaGroup C i-Al Hilal yaseSudan iguqise iSaint Eloi Lupopo yaseDemocratic Republic of Congo ngo 1-0.
I-Al Hilal iqede esicongweni ngamaphuzu angu-11, yalandelwa yiSundowns ngayisishiyagalolunye.
IMC Alger iqede endaweni yesithathu ngamaphuzu ayisikhombisa, kwathi iLupopo yaqeda emsileni ngamaphuzu amahlanu.