IBucs iziqhelise emaqenjini ayihubhayo kwiBetway
ABADLALI be-Orlando Pirates bejabulela elinye lamagoli emdlalweni wabo neMarumo Gallants.
Image: BACKPAGEPIX
I-Orlando Pirates inwebe igebe esicongweni seBetway Premiership ixebula iMarumo Gallants ngo 3-0 e-Orlando Amstel Arena ngoMgqibelo ntambama.
Amagoli eZimnyama ashaywe nguYanela Mbuthuma noPatrick Maswanganyi esiwombeni sokuqala, uRelebohile Mofokeng wengeza elinye ngasekupheleni kwesesibili.
Ngokunqoba lo mdlalo iqembu lika-Abdeslam Ouaddou libuyise izinduku kwiGallants. Leli qembu elizinze eBloemfontein yilona elagcina ukunqoba ezikaMagebhula ngesikhathi lizithela phansi ngo 2-1 koweligi ngo-Agasti nyakenye.
Kusukela lapho leli qembu alikahlulwa emiqhudelwaneni ehlukene yasekhaya.
IPirates isaqhwakele ngamaphuzu angu-38 emidlalweni engu-16. Iyishiya ngamaphuzu ayisithupha iMamelodi Sundowns, esadlale imidlalo engu-15.
La amaqembu azotholana phezulu koweligi eFNB Stadium ngoLwesithathu ngo-7.30 ebusuku.