UKhune 'ufesela' unozinti weChiefs kwiBafana
UNOZINTI weKaizer Chiefs, uBrandon Petersen, okwabashaya into ecokeme kule sizini
Image: Isithombe:BACKPAGEPIX
OMUNYE wonozinti abayohlale bebalwa nabaphambili emlandweni webhola eNingizimu Afrika, u-Itumeleng Khune, ubona kumfanele ukuthola indawo esikwatini seBafana Bafana esizodlala kwiNdebe yoMhlaba ukaputeni weKaizer Chiefs, uBrandon Petersen.
UKhune owagqama iminyaka kwiBafana nakwiChiefs, ubekhuluma ngoPetersen nabezindaba emcimbini waleli qembu laseNaturena wokwethula abaxhasi abasha bakwaCarling Black Label kuleli sonto eGoli.
IChiefs imatasa namalungiselelo omdlalo wokugcina kaGroup C weCaf Confederation Cup edinga kuwona iphuzu ukuze idlulele kuma-quarterfinal eConfederation Cup. Amakhosi azobhekana neZamalek yase-Egypt ngoMgqibelo ngo-6 ntambama eSuez Canal Stadium.
UPetersen ngomunye wabadlali abashaya into ecokeme kule sizini kwiChiefs. Emidlalweni engu-20 kuyona yonke imiqhudelwano, akangenelwanga ngamagoli kwengu-13.
Indlela adlala kahle ngayo lo nozinti oneminyaka engu-31 kule sizini, uyabehlula ngokwezinombolo onozinti beBafana okunguRonwen Williams (Mamelodi Sundowns), Sipho Chaine (Orlando Pirates) noRicardo Goss (Siwelele FC). Bobathathu bebekwiBafana kwi-Africa Cup of Nations (Afcon) eMorocco ngoDisemba.
UKhune, owayebanga ijezi noPetersen ezintini zeChiefs, ukholwa wukuthi lo nozinti owakhulela kwi-Ajax Cape Town wenze okwanele ukuthi amkhumbule umqeqeshi, uHugo Broos, uma eseqoka iBafana azoya nayo kwiNdebe yoMhlaba ezoba ngoJuni eMexico, Canada nase-United States of America (USA).
“Akukho okungaphezulu okusengenziwa nguPetersen ukuze abe yingxenye yeBafana, ngakho-ke konke kulele kumqeqeshi weqembu lesizwe,” kusho uKhune owayevimbele iBafaba kwiNdebe yoMhlaba ka-2010 kuleli.
“Ngichazwa wukuthi njengoba uPetersen edlala kahle kanjena nje unejoka lokuhola iqembu elikhulu njengeChiefs okuyinto engelula kodwa ukwenza ngesinono.
“Wanikwa ithuba kowamanqamu weNedbank Cup ngesizini edlule walibamba ngazo zombili okwenza ngibone limfanele naseqenjini lesizwe.
“Kuhle ngoba uBroos ubaqoka ngendlela abenza ngayo emaqenjini abo abadlali. Okusobala wukuthi ifomu kaPetersen iyakhula nokuyinto ezokwenza baphathwe yikhanda abazobe beqoka abadlali beqembu lesizwe abaya kweyoMhlaba.
“Ngiyakholelwa ekutheni uPetersen uzoqhubeka nokunqaba namagoli aphinde ayihole ngesinono iChiefs konke okuyizinongo zokuthi abe yingxenye yabadlali abasendizeni ebheke kwiNdebe yoMhlaba eMexico, Canada nase-USA ezinyangeni ezimbalwa ezizayo."