IBucs ethubeni lokukweletisa iDowns neChiefs

UMDLALO wangoMgqibelo weBetway Premiership phakathi kwe-Orlando Pirates neMarumo Gallants uzonika iqembu laseSoweto, ithuba lokuqinisa indawo yayo esicongweni seBetway Premiership njengoba izimbangi zayo ezinkulu, iMamelodi Sundowns neKaizer Chiefs, zisematasa nemiqhudelwano yeCaf.

IPirates neGallants bazodudulana e-Orlando Amstel Arena eSoweto, ngo-3.30 ntambama.

EZimnyama ziqhwakele kwi-log yePremiership ngamaphuzu angu-35 emidlalweni engu-15. 

Ziphambili ngamaphuzu amathathu kwiSundowns, namahlanu kwiChiefs, nabo asebedlale imidlalo engu-15.

Njengoba iqembu lika-Abdeslam Ouaddou lizobe ligxile kwiligi kule mpelasonto, iSundowns izobe ilwela ukudlulela esigabeni somkhumulajezi kwiCaf Champions League kanti iChiefs izobe ifuna ukwenza okufanayo kwiCaf Confederation Cup.

AmaBrazilian adinga ukunqoba umdlalo wawo wokugcina wamaqoqo azowudlala neMC Alger ekhaya ukuze ezongena kuma-quarterfinal eChampions League.

Amakhosi adinga okungenani iphuzu emdlalweni azowudlala ekuhambeni neZamalek yase-Egypt ukuze ezoqinisekisa indawo yawo kuma-quarterfinal eConfederation Cup.

Uma iPirates ingabuya namaphuzu aphelele kwiGallants, inganweba ingebe libe ngamaphuzu ayisithupha esicongweni phakathi kwayo neSundowns ngaphambi kokubhekana nalo leli qembu laseChloorkop naMakhosi emasontweni azayo.

Ngemuva koweGallants,  izotholona phezulu neSundowns eFNB Stadium ngoLwesithathu ebusuku, ngaphambi kokugadulisana neKaizer Chiefs, kuyona le nkundla ngoFebhuwari 28.

Nakuba iPirates iyinqobile imidlalo yayo yakamuva yeligi neNedbank Cup, izongena enkundleni yazi ukuthi ayikayihluli iGallants emizuzwini engu-90 kule sizini.

Ngesikhathi bebhekene koweligi eBloemfontein, ngo-Agasti, kunqobe iGallants ngo 2-1. 

Baphinde bahlangana kowamanqamu eCarling Knockout ngoDisemba, emdlalweni ophele zibambene ngo 0-0 ngemuva kwemizuzu engu-90 ngaphambi kokuthi iPirates inqobe ngo 1-0 kwi-extra time.

Kusukela lapho, iGallants isinqotshwe imidlalo emithathu yeligi ilandelana. Iguqiswa yi-TS Galaxy, Chiefs naMaZulu, kanjalo noweNedbank Cup esanda kuwudlala neGalaxy.

Nakuba kunjalo, isikhombisile ukuthi iyiqembu elingasheshi ukugoba uphondo uma libhekene namaqembu amakhulu. 

Abadlali abebekwiGallants ngesikhathi inqoba iPirates nyakenye, uDaniel Msendami noMpho Chabatsane, bazobe bedlubhe umfaniswano weZimnyama kulokhu kulandela ukujoyina leli qembu ngewindi likaJanuwari.

Imidlalo yeBetway Premiership kule mpelasonto:

Kusasa: Durban City vs TS Galaxy (Chatsworth Stadium, 7:30pm) , Magesi FC vs Golden Arrows (Seshego Stadium, 7:30pm)

NgoMgqibelo: Orlando Pirates vs Marumo Gallants (Orlando Amstel Arena, 3:30pm), Polokwane City vs Siwelele (Old Peter Mokaba Stadium, 6pm), Chippa United vs Richards Bay (Buffalo City Stadium, 8:15pm)

NgeSonto: Sekhukhune United vs Orbit College FC (Peter Mokaba Stadium, 3:30pm)