UCardoso ucelela iDowns 'uthando’ ngosuku lwezithandani
IQHAWE leMamelodi Sundowns eLubumbashi uJayden Adams
Image: BACKPAGEPIX
UMQEQESHI weMamelodi Sundowns, uMiguel Cardoso, unxenxa abalandeli babali qembu ukuthi bakubeke eceleni konke abangeneme ngakho, baphume ngobuningi emdlalweni wokusonga u-Group C weCaf Champions League abazowudlala neMC Alger yase-Algeria eqeqeshwa nguRulani Mokwena ngoMgqibelo.
ISundowns ibuye nephuzu eDemocratic Republic of Congo (DRC) ibambana ngo 1-1 neSaint Eloi Lupopo ngeSonto e-TP Mazembe Stadium, eLubumbashi.
Kulo mdlalo iSundowns ebilandela ngemuva kuwona ekubeni kuyiyona ebiwudinga kakhulu ukuwina, ilanyulelwe nguJayden Adams okhombisa izimpawu zokubuyelwa yifomu eyamfaka kwiBafana Bafana.
Emuva kwemidlalo emihlanu ka-Group C, iSundowns ilele endaweni yesithathu kwi-log ngamaphuzu ayisithupha. Idinga ukunqoba kwi-Alger ophekwa nguMokwena owayeyintandokazi kubalandeli baleli qembu laseChloorkop.
ISundowns idinga ukuwina ukuze izodlulela kuma-quarterfinal eChampions League.
Nokho leli qembu libhekana nesimo esinzima ngalolu hlobo nje, akukho ukuzwana phakathi kwabalandeli beSundowns noCardoso abangasamfuni.
Njengoba ngoMgqibelo kuyi-Valentine's Day okuwusuku lwezithandani nokukhombisa uthando emhlabeni wonke, uCardoso ulucele kubalandeli beSundowns kwazise leli yithuba labo lokuqedela umsebenzi ekhaya. Umdlalo uzoba seLoftus Versefeld Stadium, ePitoli, ngo-3 ntambama.
Ukubuyela eLoftus kuMokwena kufana nokuvakashela isinqandamathe sakudala ngosuku lwezithandani ekubeni sakwala kabuhlungu usasithanda.
“Umphumela oncomekayo kwi-Alger umqoka kangangokuthi uyasiphoqa ukukubeka eceleni ukungaboni ngaso linye sibumbane ngenhloso yokuqinisekisa ukuthi iSundowns ibalwa namaqembu amabili azodlulela kuma-quarterfinal,” kusho uCardoso esithangamini nabezindaba e-DRC.
“Akusona isikhathi sokunaka izinkinga ezikhungethe iqembu ngaphandle kwenkundla kepha leli yithuba lokuhlangana ngenhloso yokuweza iSundowns esiyithanda ngendlela efanayo sonke.
“Sizokugwema ukuqhakambisa ukuthi sibhekene nomqeqeshi onomlando kwiSundowns kepha sizohlonipha i-Alger ngendlela edinga ukuhlonishwa ngayo yize kusibusa ekhanda ukunqoba ekugcineni.
“Kasisekho kangako isidingo sokugxila kokwenzeke e-DRC kodwa indlela iqembu ebesibhekene nalo eliziphathe ngayo kayilisizi ibhola lase-Afrika kepha ilehlisa isithunzi.
“Sinejoka lokubuyela ekhaya ngokushesha ukuze sizozinika isikhathi esanele ukuhlelela omunye wemidlalo emqoka kunayo yonke kule sizini."