Angene ephelele awaseKZN kwiLast 16 yeNedbank
ISITOBHA saMaZulu FC uTaariq Fielies sijabulela igoli esilishaye benqoba iPolokwane City ngo 2-1 emdlalweni weLast 16 yeNedbank Cup.
Image: BACKPAGEPIX
AmaZulu FC neMilford City bagcwalise isibalo samaqembu aKwaZulu-Natal adlulele kwiLast 16 yeNedbank Cup benqoba imidlalo yokugcina yeLast 32 yalo mqhudelwano ngoLwesibili ebusuku.
Usuthu luguqise iPolokwane City ngo 2-1 e-Old Peter Mokaba Stadium, ePolokwane, iMilford yanqoba iSSU M17 ngo 5-3 sekukhahlelwa amaphenathi eDobsonville Stadium, eSoweto.
AmaZulu ahambe phambili umdlalo usanda kuqala ngegoli likaTaariq Fielies, iRise and Shine yalinganisa sekuzoyiwa ekhefini ngelivalelwe phakathi nguLebohang Nkaki.
Ukuhluleka kwala maqembu womabili ukuthola amagoli esiwombeni sesibili kuholele ekutheni umdlalo udlulele kwi-extra time, lapho uThandolwenkosi Ngwenya eshayele khona Usuthu igoli elilufake kwiLast 16 ngomzuzu ka-112.
Umdlalo weSSU M17 neMilford nawo uphele zibambene ngo 1-1 ngemuva kwemizuzu engu-90.
IMilford igadle kuqala ngegoli likaSifiso Mdluli ngomzuzu ka-31, iSSU yasheshe yabuya ngegoli elishaywe nguThapelo Tshilo ngoka-43.
Alikho iqembu elikwazile ukubhakuzisa inethi esiwombeni sesibili nakwi-extra time, umdlalo wadlulela kumaphenathi.
Kuthe sekukhahlelwa amaphenathi iMillford yawabeka phakathi womahlanu awayo, iSSU M17 yashweba eyodwa.
Usuthu neMilford bajoyine amanye amaqembu aKwaZulu-Natal abesezibekisele izindawo kwiLast 16 okuyiDurban City, Lamontville Golden Arrows, Mkhambathi FC neRichards Bay FC.
Amanye amaqembu adlulele kulo mzuliswano yiMamelodi Sundowns, Stellenbosch FC, Vasco Da Gama, Sekhukhune United, Upington City, Casric Stars, Orlando Pirates, Jacksa Spears, TS Galaxy ne-University of Pretoria.
Amaqembu azodudulana kwiLast 16 azoqhathwa emcimbini ozobanjelwa eGoli ngoLwesithathu ngo-6.30 ntambama