UCardoso uchaze abamhhewulayo njengabaphoxa uMandela
UMQEQESHI weMamelodi Sundowns, uMiguel Cardoso, uzizwa engahloniphekile ebholeni laseMzansi
Image: BACKPAGEPIX
INHLOKO yabaqeqeshi ehleli ngesinqe esisodwa kwiMamelodi Sundowns, uMiguel Cardoso, ichaze izingxenye ezithile zabalandeli baleli qembu njengabaphoxa izimfundiso zikaNelson Mandela.
ISundowns itabalase kwaze kwalunga esiwombeni sesibili ngesikhathi inqoba ngo 2-1 kwiGomora United emdlalweni we-Last 32 yeNedbank Cup ngoLwesithathu ebusuku, eLoftus Versfeld Stadium ePitoli.
Ukudonsa kanzima kweSundowns ibhekene neqembu elidlala kwiMotsepe Foundation Championship, kwenzeke uCardoso odabuka ePortugal, esenyamanambana kwezinye izingxenye zabalandeli.
Lokhu kudalwa yindlela yokudlala abalandeli beSundowns abayichaza njengengagculisi ngaphansi kwesandla sakhe kusukela ngasekupheleni kwesizini edlule.
Ngeledlule kuphanyekwe ezinkundleni zokuxhumana i-video ekhombisa imoto kaCardoso ipakile kunombhalo ethi, “Umqeqeshi akakwazi ngisho ukupaka imoto.”
Leyo video kayihlalanga kahle kuCardoso ogcine ebhodla kwabezindaba emuva komdlalo neGomora.
Ukhale ngokungahlonishwa ngabezindaba nabantu baseNingizimu Afrika, wabachaza njengabaphoxa izimfundiso zikamengameli wokuqala wentando yeningi kuleli, uMandela owayeshumayela ivangeli lokuthula nokwazisana.
“Engikucelayo yinhlonipho kuphela ngoba asikho isidingo sokududula umqeqeshi ekubeni esahlale emsebenzini izinyanga ezingu-14 kuphela,” kusho uCardoso.
“Angizele ukuzofela kwiSundowns. Ngicela ithuba lokusebenza ngokukhululeka bese ngiyahamba uma sekushaye isikhathi sami sokuhamba.
“Kungenaphi ukuthi ibala lomqeqeshi linjani? Kuhlanganaphi nomsebenzi wami ukuthi imoto ngiyipaka kanjani? Konke lokhu kuphambene nezimfundiso zikaMandela.
“ISundowns yiqembu elinezinhlaka eziqinile kuwona wonke amakhona futhi iphethwe ngabantu abayaziyo into abayenzayo ngakho-ke kasikho isidingo sokuvumela idlanzana labazibiza ngabalandeli bayo ukuba linyomfe le nqanawe esizama ukuyakha."
Lo mqeqeshi ubalisa kanjena nje, umelwe wumdlalo ka-Group C weCaf Champions League abazowudlala neSaint Eloi Lupopo yaseDemocratic Republic of Congo (DRC) ngeSonto ngo-3 ntambama, e-TP Mazembe Stadium, eLubumbashi. ISundowns isendaweni yesibili ngamaphuzu ayisihlanu kuleli qoqo eliholwa yi-Al Hilal yaseSudan, ngayisishiyagalombili emuva kwemidlalo emine.