U-Ouaddou ethubeni lokukhokha isikweletu sikaRiveiro
UMQEQESHI we-Orlando Pirates, u-Abdeslam Ouaddou esithangamini nabezindaba, ekhuluma ngamalungiselelo eqembu lakhe okuqala iNedbank Cup
Image: BACKPAGEPIX
I-ORLANDO Pirates eholwa ngumqeqeshi, u-Abdeslam Ouaddou, inengqayizivele yethuba lokukhokha isikweletu kubalandeli baleli qembu laseSoweto, kulandela ukuphucwa iqatha emlonyeni yiKaizer Chiefs eyehlule kowamanqamu weNedbank Cup ngesizini edlule.
IBucs izovula iNedbank ngomdlalo we-Last 32 nompetha bango-2021, iTshakhuma Tsha Madzivhandila ngoMgqibelo ngo-3 ntambama, eMoses Mabhida Stadium, eThekwini.
Okungase kube yinkinga kwiPirates wukuthi i-TTM inomlando wokuyinqoba yonke imidlalo ye-Last 32 esike yayidlala (5) kusukela lo mqhudelwano waqanjwa ngeleNedbank.
Kufanele ukuba kuseyisilonda kubalandeli bePirates ukuthi izimbangi zabo ezinkulu, iChiefs, ziyiqembu eliqede ngabo indlala yezinkomishi yeminyaka eyishumi.
IPirates esisidle amahlandla amane isicoco seNedbank emlandweni, iphoxe abalandeli bayo ngokwehlulwa yiChiefs ebinganikwe lutho ngenxa yefomu ngaphambi komdlalo wamanqamu.
Lo mdlalo iPirates iwudlale sekuvele kwaziwa ukuthi isithandwa sabalandeli, uJose Riveiro, sesivumelane ne-Al Ahly yase-Egypt, esingahlalanga isikhathi eside kuyona.
Ngesikhathi u-Ouaddou ekhuluma nabezindaba abenesithangami nabo ekomkhulu lakwaNedbank eMhlanga, eThekwini, izolo, ukubeke kwacaca ukuthi okubabusa emqondweni wukudlulela kwi-Last 16.
“Kunzima ukukhuluma ngokwenzeka kwiPirates ngingakafiki kodwa engingakusho ngikhululeke wukuthi nalesi sicoco sisibhekile ngoba siyiqembu okufanele vele libalwe kuyona yonke imiqhudelwano,” kusho u-Ouaddou osefake i-MTN 8 neCarling Knockout ekhabetheni lezinkomishi leBucs kusukela efikile.
“Okungeke sikubalekele wukuthi silwa izimpi eziningi kule sizini futhi ayikho esiyibona ingcono kumbe ilula kunezinye. Siyibhekile iNedbank kanjalo neligi sizibona sinethuba lokuyidla.
“Sifike nabadlali abangu-22 (eThekwini) nengicabanga ukuthi kuyizinkomba ezisobala zokuthi kasiwuthathi kancane kangakanani umdlalo wethu neTshakhuma. Lo mqhudelwano ubaluleke kubona bonke abathintekayo kwiPirates.
“Sizosebenzisa wonke amandla esinawo kodwa okuzoba seqhulwini ukuthi singasithathi kancane isitha sethu ngoba lokhu kungasishiya siphoxekile,” kulandisa lo mqeqeshi.
“IPirates imelwe wukuyinqoba yonke imiqhudelwano eyidlalayo ngakho-ke nakwiNedbank sibheke ukuqukula. Sonke sasayina inkontileka sivuma ukuthi siyoyinqoba yonke imidlalo yethu ngakho-ke nakulo olandelayo simelwe wukunqoba kungakhathaleki ukuthi kusekhona inhlese yegqubu langesizini edlule noma cha."