IBanyana izolungiselela iWafcon ngeCosafa

UMQEQESHI weBanyana Banyana, uDesiree Ellis, umemezele isikwati sabadlali abangu-38 esizolungiselela imiqhudelwano emibili, iCosafa Women’s Championship neWomen’s Africa Cup of Nations.

Ikhempu yeBanyana izoqala ngoFebhuwari 13, ngaphambi kokuthi kumenyezelwe uhlu lwabazodlala koweCosafa nakwi-Wafcon.

Umqhudelwano weCosafa wanonyaka uzobanjelwa ePolokwane, kusukela ngoFebhuwari 18 kuya kuMashi 1.

Iqembu lakuleli lizogadulisana neMalawi, Lesotho ne-Angola kuGroup A. KuGroup B kuqhathwe iZambia, Botswana, Eswatini neZimbabwe, kanti kuGroup C kuzodudulana iMozambique, Namibia neMadagascar.

Iqembu lakuleli lizobe selilibangisa kwiWafcon okubhekwe ukuthi idlalelwe eMorocco, kusukela ngoMashi 17 kuya ku-Ephreli 3.

Kuke kwavela ukuthi iMorocco ingase ihoxe ekusingatheni lo mqhudelwano, nokungabeka iNingizimu Afrika ethubeni lokuthi kube yiyona evala isikhala kodwa asikaphumi isinqumo ngalokhu.

U-Ellis uqoke abadlali abaqhamuka emaqenjini enze kahle kwiHollywoodbets Super League ngesizini ka-2025, okubalwa kuwona ompetha iMamelodi Sundowns, JVW FC, TS Galaxy Queens namanye.

Ubize nabadlali abagijima phesheya okubalwa kubona u-Amogelang Motau, Linda Motlhalo, Thembi Kgatlana, Hilda Magaia nabanye.

Kubuye nomdlali wasesiswini, uGabriela Salgado, owaphuka ngesikhathi iBanyana idlala kowandulela owamanqamu neNigeria kwiWafcon nyakenye.

Isikwati seBanyana esizolungiselela iCosafa neWafcon

Onozinti: Kaylin Swart, Casey Gordon (JVW), Andile Dlamini (Mamelodi Sundowns), Dineo Magagula (TS Galaxy Queens).

Izitobha: Fikile Magama, Shakira O’Malley, Sinegugu Zondi, Lonathemba Mhlongo, Antonia Maponya, Unathi Simayile (UWC), Asanda Hadebe, Bambanani Mbane, Karabo Dhlamini, Khutso Pila, Lebogang Ramalepe (Sundowns); Yolanda Nduli (University of Johannesburg); Sibahle Maneli (TS Galaxy Queens).

Abasesiswini: Gabriel Salgado, Thorisho Mphelo, Regina Mogolola, Bongiwe Thusi (JVW), Sbongakonke Mzobe (UJ), Gugu Dhlamini, Nonhlanhla Mthandi, Isabella Ludwig (Sundowns); Sibulelele Holweni (UWC) Refiloe Jane (TS Galaxy Queens), Amogelang Motau (Club Tijuana); Zoe October (Spurs WFC) , Bongeka Gamede (Nordsjaelland), Jessica Wade (Aland United), Linda Motlhalo (Glasgow City).

Abagadli: Noxolo Cesane, Nthabiseng Majiya (Sundowns), Hildah Magaia (Deportuvo La Coruna), Thembi Kgatlana (Tigres UANL), Bonolo Mokoma (JVW), Thato Mofola (UJ).