UMakhaula nesifiso sokudla eseligi neBucs ngaphambi komhlalaphansi
UMDLALI wasesiswini we-Orlando Pirates, uMakhehleni Makhaula, ofisa ukudla isicoco seligi kuqala ngaphambi kokuwagaxa emgibeni
Image: BACKPAGEPIX
OMUNYE wabadlali be-Orlando Pirates asebenokhakhayi oluqinile, uMakhehleni Makhaula (36), unesifiso sokudla isicoco seBetway Premiership naleli qembu laseSoweto, ekupheleni kwesizini ka-2025/2026, ngaphambi kokucabanga ngokuwagaxa emgibeni amakhokho.
UMakhaula ozohlanganisa iminyaka engu-37 ngoNovemba nonyaka, usanda kutshela abezindaba ngesifiso sakhe sokuwina isicoco seligi ngaphambi kokuthatha umhlalaphansi.
Leli qembu laseSoweto elithishwe ukuba liqede indlala yeminyaka, lagcina ukuwina iligi ngesizini ka-2011/2012. Kule sizini kunomuzwa wokuthi iPirates ingase iyigudluze iMamelodi Sundowns esikhonye amasizini ayisishiyagalombili kulandelana ebholeni laseMzansi.
Ngokusho kukaMakhaula, ongakaze asiphakamise isicoco seligi kuwona wonke amaqembu adlule kuwona, ukuhlabana kwePirates kungase kumphushele ekutheni aqale ukucabanga ngokushenxa kulo mdlalo awuqala ngo-2014, kwiFree Stete Stars.
“Ukuwina isicoco seligi nePirates kungafana nempendulo evela kuMdali kwazise kungenye yezinto ezingakaze zisuke emqondweni wami,” kusho uMakhaula.
“Angikaze ngisiwine isicoco seligi ngakho-ke kungangithobisa ukukwenza lokhu neqembu elithathwa njengelikhulu ebholeni laseNingizimu Afrika, iPirates. Anginawo amandla okubuyisela iminyaka emuva ngakho-ke ngiyazi ukuthi ngelinye ilanga ngiyophoqeleka ukuwabeka ethala amakhokho.
“Kungangijabulisa kakhulu ukunqoba iligi kule sizini njengoba kuthembisa. Konke kusezandleni zethu ukuthi singawudedeli umgqigqo esiqale ngawo.
“Sinalo lonke uhlobo lomdlali oludingekayo ukuze iqembu liwine isicoco seligi. Okusele kungakithina ukuthi senzani ngabadlali esinabo kule sizini."
Inkontileka kaMakhaula ivuselelwe ngonyaka kwiPirates, izophela ekupheleni kwesizini ka-2025/2026.