IPirates ibuyele esicongweni seBetway
URelebohile Mofokeng (ngakwesokudla) ejabulela igoli alishaye bedlala naMaZulu FC nozakwabo uYanela Mbuthuma.
Image: BACKPAGEPIX
AmaZulu (0) 0
Orlando Pirates (1) 1
I-ORLANDO Pirates iwusebenzise ngendlela efanele umdlalo ebisele ngawo kwiMamelodi Sundowns, iguqisa AmaZulu FC ngo 2-0 emdlalweni weBetway Premiership eMoses Mabhida Stadium NgoLwesibili ebusuku.
Amagoli anqobise Ezimnyama azibuyisela esicongweni se-log ashaywe nguRelebohile Mofokeng esiwombeni sokuqala, elesibili labekwa enethini unozinti waMaZulu, uDarren Johnson, umdlalo usuyophela.
EzikaMagebhula sezihamba phambili kwi-log ngamaphuzu angu-35 emidlalweni engu-15, zilandelwe amaBrazilian aseqoqe amaphuzu angu-32 emidlalweni elinganayo.
AmaZulu asasendaweni yesine ngamaphuzu angu-30 emidlalweni engu-17.
UMofokeng ubhakuzise inethi imidlalo emibili ilandelana, kwazise uthole elinye igoli benqoba iMagesi FC ngempelasonto. Kulokhu ulibeke enethini ngekhanda ngomzuzu ka-16 kulandela ibhola ebeligotshwe nguTshepang Moremi.
UMofokeng uphinde waba nesandla egolini lesibili njengoba ededele ishodi elishaye ipali, lashayisa kunozinti woSuthu, layongena phakathi ngesikhathi ebesengezwe ngunompempe esiwombeni sesibili.
EzikaMagebhula zizobuyela eMoses Mabhida Stadium ngoMgqibelo ngo-3 ntambama emdlalweni weLast 32 yeNedbank Cup neTshakuma Tsha Madzivhandila.
Usuthu luzodlala koweNedbank nePolokwane City e-Old Peter Mokaba Stadium, ePolokwane, ngoLwesibili ngo-7.30 ebusuku.