UCardoso nomqansa wokubuyisa abalandeli beDowns
UMQEQESHI weMamelodi Sundowns, uMiguel Cardoso, ohleli ngesinqe esisodwa esikhundleni sakhe
Image: BACKPAGEPIX
NAKUBA uMiguel Cardoso weMamelodi Sundowns ekhulumisa okomuntu osahlalele ethembeni kodwa abuzibeki ubunzima bemidlalo emsalele ku-Group C weCaf Champions League abazoyidlala neSaint Eloi Lupopo yaseDemocratic Republic of Congo ekuhambeni neMC Alger yase-Algeria ekhaya.
ISundowns izandisele umsebenzi ikhala ngaphansi ngo 2-1 kwi-Al Hilal Omdurman yaseSudan, emdlalweni waleli qoqo odlalelwe eTanzania ngoLwesihlanu oludlule.
Lo mphumela awuzange ugcine ngokuxegisa amathuba eSundowns okudlulela kuma-quarterfinal kwiChampions League kepha uzophinde ubuyise ingcindezi kuCardoso onyamanambana kwezinye izingxenye zabalandeli beSundowns.
Imidlalo emibili esalele iSundowns kuleli qoqo inzima. Kowokuqala izowudlala neLupopo ekuhambeni ngoFebhuwari 8. Leli qembu likhiphe i-Orlando Pirates kusahlungwa ngokuyinenebula ngo 3-0 kowomlenze wokuqala owawudlalelwa e-DRC ngaphambi kokudlula kumaphenathi eMzansi.
Ukubhekana neLupopo akusho lutho kangako ngokwenzeka enkundleni kwazise amaqhinga ayo amaningi angaphandle kwayo. ISundowns kufanele iwine lowo mdlalo, iphinde inqobe nakwi-Alger ephekwa nguRhulani Mokwena olazi ukusuka nokuhlala leli qembu laseChloorkop, kwazise wadla nalo inqwaba yezicoco.
Owe-Alger okuyiwona ozosonga iqoqo uzoba seLoftus Versfeld Stadium, ePitoli, ngoFebhuwari 13.
Siye koshicilela lo mbiko ungakadlalwa oweLupopo ne-Alger ogijinywe izolo ebusuku e-Algeria.
Ku-Group C kuqhwakele i-Al Hilal ngamaphuzu ayisishiyagalombili emidlalweni emine, kulandele iSundowns ngamane emidlalweni eyisibalo esifanayo. Silobe kuyiLupopo esendaweni yesithathu ngamaphuzu amane kodwa ibisazodlala ne-Alger ebambe ibhuleki ngephuzu. ILupopo ne-Alger bebesadlale emithathu.
UCardoso obebonakala ebusweni ukuthi uswele umgodi wokucasha ngenxa yomphumela abawuthole kwi-Al Hilal, uvike ngokukhathala kwabadlali bakhe.
“Bekucacele ngisho ingane encane ukuthi abadlali beSundowns bebekhathele kulo mdlalo,” kusho uCardoso esithangamini nabezindaba.
“Nangesizini edlule saba sesimweni esifanayo lapho sahlulwa khona emdlalweni wesine, saphoqeleka ukuyonqoba eCongo, kowesihlanu njengoba nakulokhu kufana.
“Konke kusezandleni zethu. Sishaywe ngoba iqembu ebesibhekene nalo alinayo imidlalo ethothene njengathi kwiPremier Soccer League (PSL) yize ngingazami ukucasha ngesithupha.
“Sizobuyela ekhaya sihlanganise isikimu somdlalo weNedbank Cup (neGomora United) maphakathi nesonto bese kuba yima sicabanga ngeLupopo engingangabazi ukuthi singayishayela eCongo."