IDowns incisha iBucs inkululeko kwiDiski

IMAMELODI Sundowns iqhubekile nokukhombisa ukuthi yilona iqembu okungathenjelwa kulona ekuphazamiseni i-Orlando Pirates eshosholozayo emjahweni weligi yeDStv Diski Challenge.

ISundowns icoshe amaphuzu amathathu kwiSiwelele FC emdlalweni obuse-UJ Soweto Campus izolo, ewunqobe ngo 2-1. Lo mphumela uqinisekise ukuthi iSundowns isahleli endaweni yesibili kwi-log ngamaphuzu angu-36 emuva kwemidlalo engu-17.

IPirates, exebule iSekhukhune United ngo 2-1, izihola phambili ngamaphuzu angu-43 emuva kwemidlalo engu-17. Ukuvula kwayo igebe lamaphuzu ayisikhombbisa esicongweni se-log akubuzwa ukuthi kuyibeka ebuhleni njengoba sekuqale umzuliswano wesibili wesizini yeDiski.

Nokho, iSundowns isalokhu iqhubekile nokuhlala eduze, igade ukuqhuzuka kweZimnyama ezisemkhankasweni wokuwina iligi okokuqala emlandweni weDiski eyasungulwa ngo-2014.

Nakuba iSundowns ibukeka izoyifaka ingcindezi iPirates kodwa kunzima ukuziba iStellenbosch esiyiwine kabili iligi yeDiski. Leli qembu, eliphekwa ngu-Evangelos Vellios, linyukele endaweni yesithathu kwi-log ngamaphuzu angu-34 ngemuva kokwehlula iMagesi ngo 4-1 e-Idas Valley, eStellenbosch, ngoMgqibelo.

Akubuzwa ukuthi ukwenyuka kweStellies, esele ngamaphuzu amabili kwiSundowns, kuzoyinika ithemba lokuthi isengafika esicongweni uma kuqhuzuka iPirates ejwayele ukwehluleka ekugcineni.

Womabili amaqembu alandela iPirates anaso isipiliyoni sokuwina iligi kodwa eZimnyama zishaya ngomqeqeshi, uRoscoe Krieling, owayiphakamisa indebe kwiSuperSport United eyiphini likaThabo Septhemba. 

Okudingwa yiPirates wukuqhubeka nokuqoqa amaphuzu ukuze ingaphindwa okujwayelekile, okuwukulahla iligi emidlalweni yokugcina yesizini.

Imiphumela yemidlalo yeDStv Diski Challenge:

Kaizer Chiefs 0-0 TS Galaxy; Orlando Pirates 2-1 Sekhukhune United; Stellenbosch FC 4-1 Magesi; Richards Bay FC 3-4 Golden Arrows; Chippa United 0-2 Durban City; Siwelele FC 1-2 Mamelodi Sundowns; Marumo Gallants 0-1 AmaZulu; Polokwane City 0-0 Orbit College.