IBucs ivale igebe leDowns kwiBetway
UMDLALI we-Orlando Pirates uRelebohile Mofokeng oqokwe njengomdlali ovelele benqoba iMagesi FC ngo 2-0.
Image: BACKPAGEPIX
I-Orlando Pirates ikhuphuke yayohlala endaweni yesibili kwi-log yeBetway Premiership iguqisa iMagesi FC ngo 2-0 emdlalweni obuse-Orlando Amstel Arena, eSoweto, ngoMgqibelo ntambama.
Igoli lokuqala lezikaMagebhula livalelwe enethini nguYanela Mbuthuma ngomzuzu wesishiyagalombili kulandela umnyakazo omuhle kaRelebohile Mofokeng ngakwesokunxele.
Laba badlali baphinde bahlangana kahle ngomzuzu ka-40, kulokhu uMbuthuma ethola uMofokeng ngaphandle kwebhokisi, oshaye ishodi eliwungundatshani lamudla unozinti wemagesi u-Elvis Chipezeze.
Ukuqoqa amaphuzu amathathu okokuqala kulo nyaka kubeke iqembu lika-Abdeslam Ouaddou endaweni yesibili ngamaphuzu angu-32 emidlalweni engu-14.
Liyalingana neMamelodi Sundowns esidlale imidlalo engu-15, esiqhwakele ngenxa yesibalo samagoli.
Kweminye imidlalo yeBetway Premiership, AmaZulu FC anqobe iMarumo Gallants ngo 1-0 eDr Molemela Stadium, eBloemfontein, ngegoli likaMlondi Mbanjwa, kwathi iChippa United yaqumba phansi iDurban City ngo 2-0 ngamagoli kaSinoxolo Kwayiba eBuffalo City Stadium, e-East London.
Umdlalo obuse-Old Peter Mokaba Stadium phakathi kwePolokwane City ne-Orbit College uphele zibambene ngo 2-2.
Womabili amagoli ePolokwane ashaywe nguThabelo Tshikweta, awe-Orbit aqhamuka ku-Atisang Batsi noBradley Ralani.