IBay ne-Arrows babambene kowomkhaya weBetway
UMDLALI weLamontville Golden Arrows uSiyanda Ndlovu emakwe nguSbani Mntungwa weRichards Bay.
Image: BACKPAGEPIX
IRichards Bay FC neLamontville Golden Arrows bacazelane amaphuzu bebambana ngo 2-2 emdlalweni weBetway Premiership eMhlathuze Sports Complex ngoLwesihlanu ebusuku.
INatal Rich Boyz ihambe phambili ngephenethi ebekwe enethini nguMoses Mthembu ngomzumzu wesishiyagalolunye.
Nokho, Abafana Bes’thende bakwazile ukuthola igoli lokulinganisa ngesikhathi uLungelo Nguse elivalelwa phakathi eseduze ngomzuzu ka-27, ehlangana nebhola ebeligotshwe nguSiyanda Ndlovu.
UNdlovu uzitholelele igoli lakhe ngomzuzu ka-50, esebenzisa ijubane lakhe ukushiya izitobha zeBay, wajika nonozinti ngaphambi kokulibeka enethini.
IBay ikwazile ukuqinisekisa ukuthi iphuma nokuthile kulo mdlalo wayo wasekhaya ngegoli elingqofelwe phakathi nguLundi Mahala ngomzuzu ka-65.
Lo mphumela ushiye iBay endaweni yesishiyagalolunye kwi-log ngamaphuzu angu-19 emidlalweni engu-16.
Abafana Bes’thende basendaweni ka-10 ngamaphuzu angu-17 emidlalweni engu-16.I-Arrows izobhekana ne-Orbit FC eKing Zwelithini Stadium ngoMgqibelo ozayo ngo-6 ntambama emdlalweni weLast 32 weNedbank Cup.
IBay izotholana phezulu neSiwelele eDr Molemela Stadium ngeSonto elizayo ngo-6 ntambama komunye weNedbank Cup