U-Ouaddou akayigqizi qakala eyegebe leDowns

UKUNCIPHISA igebe elivulwe yiMamelodi Sundowns phakathi kwayo namanye amaqembu esigaba esikhulu sebhola laseNingizimu Afrika kumasizini adlule akuyona into umqeqeshi we-Orlando Pirates, u-Abdeslam Ouaddou, azihlupha ngokucabanga ngayo kepha okubusa umqondo wakhe wukuyigudluza esicongweni.

Kumasizini ayisishiyagalombili adlule, wonke amaqembu eBetway Premiership abephelezele iSundowns esidle iphindelela isicoco seligi.

Nokho kunomuzwa ohlukile nokho kule sizini kwazise kukhona abakholwa wukuthi iPirates inethuba lokususa iSundowns eqhulwini.

Lokhu kungenxa yendlela iPirates eqinise ngayo isikimu kusukela kuqale isizini nokubhimba kwezinto kwiSundowns ngaphansi kwesandla somqeqeshi, uMiguel Cardoso.

Yize iPirates ibuyele emidlalweni yeligi ngokubambana neSekhukhune United ngempelasonto edlule kodwa umqeqeshi wayo waseMorocco, u-Ouaddou, uthembise umfutho ohlukile kulokhu njengoba bezobe bedlalela ekhaya.

Ubekhuluma esithangamini nabezindaba eRand Stadium, eGoli, lapho iPirates ibizicijela khona ukubhekana neMagesi FC emdlalweni weligi ozoba ngoMgqibelo ngo-3 ntambama, e-Orlando Amstel Arena, eSoweto.

“Konke engidinga ukukwazi ngokwezidingo zePirates ngiyakwazi ngakho-ke ngeke ngisuke ohlelweni lwami lokuqoqa amaphuzu kuyona yonke imidlalo,” kusho u-Ouaddou ebuzwa ngokunciphisa igebe phakathi kwePirates neSundowns kule sizini.

“Anginandaba negebe eliphakathi kweSundowns namanye amaqembu kepha ngiphupha ngokuwina isicoco seligi. Ngiyaqonda ukuthi ngeke kubelula ukukwenza lokho kodwa ngiyakholelwa ekutheni sinawo amava okuyigudluza esicongweni iSundowns.

“Okungibusa umqondo wukudla isicoco seligi. Ngiyazi futhi ukuthi ukuze kwenzeke lokho kusemqoka kangakanani ukuthi sinqobe yonke imidlalo yethu yasekhaya neyasekuhambeni.

“IMagesi ngeke isenzele kubelula kodwa engingakuqinisekisa wukuthi iqembu lami lizodlala kangcono kakhulu kulokhu kwazise lizobe sesidlalela ekhaya."

Imidlalo yeBetway Premiership:

NgoLwesihlanu:

Richards Bay v Golden Arrows (Mhlathuze Sports Complex, 7.30pm)

NgoMgqibelo:

Marumo Gallants v AmaZulu (Dr Molemela Stadium, 3.30pm); Polokwane City v Orbit College (Old Peter Mokaba Stadium, 5.30pm); Orlando Pirates v Magesi (Orlando Amstel Arena, 6pm); Chippa United v Durban City (Buffalo City Stadium, 8pm); 

NgeSonto:

TS Galaxy v Sekhukhune United (Mbombela Stadium, 3.30pm)