IChiefs inombele ngeMarumo igudluza iBucs kwi-log
UPASEKA Mako weKaizer Chiefs eshiya phansi uNdabayithethwa Ndlondlo emdlalweni weBetway Premiership eDr Molemela Stadium, eBloemfontein, ngoLwesithathu ebusuku
Image: Isithombe:BACKPAGEPIX
IKAIZER Chiefs izibeke obala izinhloso zokushisisa umbango wesicoco seligi yeBetway Premiership ngokuqoqa amaphuzu amathathu kwiMarumo Gallants emdlalweni weligi eDr Molemela Stadium, eBloemfontein, ngoLwesithathu ebusuku.
Igoli enqobe ngalo iChiefs livalelwe phakathi nguGlody Lilepo esiwombeni sesibili.
Ngokuqoqa amaphuzu amathathu, iChiefs inyukele endaweni yesibili kwi-log, yagudluza izimbangi i-Orlando Pirates. Ezinsukwini ezedlule abaqeqeshi beChiefs baveze ukuthi leli qembu lisebenzela ukuhlala kwabanga isicoco seligi kuze kuphele isizini. Lokhu kufakazelwe ngumdlali wasemuva osemncane, u-Aden McCarthy, ekuqaleni kwesonto ethi abaphuphi uma bekhuluma indaba yesicoco seligi osekuphele iminyaka eyishumi bagcina ukusiwina.
Amakhosi asendaweni yesibili ngamaphuzu angu-30, elandelwe yiPirates ngawu-29 kule ligi eholwa yiMamelodi Sundowns ngawu-32.
Ngemuva komdlalo, umqeqeshi weChiefs uCedric Kaze, ugcizelele ubumqoka bokuqhubeka nomgqigqo kubafana bakhe.
"Kufanele sisebenze zonke izinsuku. Kufanele sizigxeke zonke izinsuku ukuze sizonyusa izinga njalo. Abadlali bayafuna ukusebenza, nathi siyafuna ukusebenzela iKaizer Chiefs. Bonke baphendula ngendlela enhle enkundleni futhi kufanele sisebenze kanzima ngoba le sizini isekude ukuphela,"kusho uKaze.
IChiefs izobuyela enkundleni uma isiyobhekana neZESCO United emdlalweni wesigaba samaqoqo kwiCaf Confederation Cup eMoses Mabhida Stadium, eThekwini, ngoMgqibelo ngo-3 ntambama.