UCardoso akakuqondi okucika abalandeli beDowns

UMQEQESHI weMamelodi Sundowns osenuka iqaqa kwezinye izingxenye zabalandeli baleli qembu laseChloorkop, uMiguel Cardoso, akasiboni isidingo sokuxhamazeliswa wumphumela abawuthole ekhaya ngeledlule kwiCaf Champions League ngesikhathi bebanjwa yi-Al Hilal Omdurman yaseSudan.

ISundowns ibithwelwe ngeqoma ngesikhathi ibhekene ne-Al Hilal yabanjwa ngo 2-2 emdlalweni ka-Group C weChampions League ngoLwesihlanu, eLoftus Versfeld Stadium, ePitoli. Ukungawini kwayo kuholele ekutheni abalandeli bangenami, bafuna izimpendulo kuCardoso nakuFlemming Berg oyi-Technical Director. UCardoso uphume ngesango lasemuva kwazise abalandeli bebethi kabamudle bamfele ngenxa yentukuthelo.

Lo mdlalo uqale vele ikusasa likaCardoso lisematheni kwazise awashabalali amahlebezi akhomba ukuthi uPitso Mosimane okusenguyena yedwa owawinisa iSundowns iChampions League, usendleleni ebuyayo.

Ubufakazi balokhu yindlela abalandeli beSundowns abebecula ngayo igama likaMosimane emuva komdlalo obekuwukumtshela ngqo uCardoso ukuthi abasamfuni kuleli qembu. UBerg uthelwe ngoketshezi oluthile, wasala emayoywana. 

“Angisiboni isidingo sokudinwa kangako ngoba kasizange sishaywe futhi konke kusesezandleni zethu uma kuziwa ngasekukhonyeni iqoqo,” kusho uCardoso.

Abalandeli bakhala ngendlela adlalisa ngayo ibhola uCardoso, hhayi imiphumela kodwa yena kwabezindaba ukhulumise okomuntu ongaqondi ukuthi yini abhekene nayo.

“Besikulindele ukuthi i-Al Hilal izoma emuva ngakho-ke okwenzekile akuzange kusethuse. Okufanele sikwenze wukunqoba umdlalo wethu olandelayo eTanzania (ngoLwesihlanu) ngeqembu elifanayo.

Ëminye imiphumela yeqoqo kayisho lutho kithina kepha esikubhekile yilokhu esingakwenza. Konke kusezandleni zethu ngakho-ke angisiboni isidingo sokuxhamazela ngoba ngokwami akukho okonakele."