ICity ethubeni lomlando kwiChampionship

I-CAPE Town City iqinise umkhankaso wayo wokubuyela kwiBetway Premiership iqoqa amaphuzu amathathu kwiGomora United eDobsonville Stadium, eSoweto, ngoLwesihlanu ntambama.

ICity igawulwe yizembe kwiPremiership ekupheleni kwesizini ka-2024/2025, yehlela kwiMotsepe Foundation Championship. Nokho impilo ayibange isafana kuleli qembu kwazise liqale kabi kwiChampionship kulandela ukuchitha abadlali abaningi abanamava ebelidlala ngabo kwiPremiership. Emuva kokuthi lisayinise abanye abaziwayo ebholeni laseMzansi, liqalile ukuqoqa amaphuzu. Kuyiwe ekhefini le-Africa Cup of Nations (Afcon) ngoDisemba, iCity isiwubambile umgqigqo. 

NgoLwesihlanu, i-The Citizens ibuye isilandela ngemuva yaqoqa amaphuzu amathathu kwiGomora engomakoti kwiChampioship, yagcina inqobe ngo 2-1 wamagoli kaTherlo Mossa noCayden Fortune. ICity isidlale imidlalo eyisithupha ingahlulwa futhi isiwine emine ilandelana. 

Ukuqhubeka nokuwina kweCity akubuzwa ukuthi kufaka ingcindezi emaqenjini aphezulu kwi-log okubalwa kuwona iMilford esesicongweni, ekhale ngaphansi kwi-University of Pretoria ngo 3-2 ekuhambeni ngoMgqibelo. I-The Citizens isendaweni yesine ngamaphuzu angu-25 emidlalweni engu-15. Isele ngamabili kwiMilford ezihola phambili ngawu-27 emidlalweni engu-15. IKruger United esendaweni yesithathu, iphunyukwe yithuba lokuhlala esicongweni se-log yeChampionship ibanjwa yiBaroka ngo 1-1 ekhaya. IKruger ibambene neCasric Stars ngamaphuzu angu-26 iqembu ngalinye. 

Uma iCity iphumelela ukuwina iligi ekupheleni kwesizini ka-2025/2026, izolandela ezinyathelweni zamaqembu agawulwa yizembe kwiPremiership kodwa ashesha ukubuya. Kulawo maqembu kubalwa iLamontville Golden Arrows eyadliwa yizembe ngesizini ka-2014/2015 kodwa yabuya ngelandelayo neChippa United eyehlela kwiChampionship ngesizini ka-2012/2013, yabuya ngesizini ka-2013/2014. 

Imiphumela yemidlalo yeMotsepe Foundation Championship:

Highbury 1-2 Lerumo Lions; Gomora United 1-2 Cape Town City; Kruger United 1-1 Baroka; University of Pretoria 3-2 Milford; Venda 1-0 Upington City; Leicesterford City v The Bees; Hungry Lions v Black Leopards