UTinkler nethemba lokukhiphela isibhongo kwiPirates
UMDLALI weSekhukhune United, uKeletso Makgalwa, ngomunye azothembela kubona umqeqeshi u-Eric Tinkler uma sebebhekene ne-Orlando Pirates emdlalweni weligi ngoMgqibelo
Image: Isithombe:BACKPAGEPIX
UKHOLWA wukuthi abadlali bakhe bazokwazi ukuvuka bazithathe uma sebebhekene ne-Orlando Pirates emdlalweni omqoka weBetway Premiership ngoMgqibelo, umqeqeshi weSekhukhune United, u-Eric Tinkler.
IBabina Noko neZimnyama bazotholana phezulu ePeter Mokaba Stadium, ePolokwane, ngo-3.30pm.
EzikaTinkler zizongena kulo mdlalo zihlose ukwenza kangcono kulandela ukunqotshwa yiStellenbosch FC ngo 1-0 kuyona le nkundla ngoLwesibili ebusuku. Igoli leStellies lishaywe nguTshegofatso Mabasa.
Lo mqeqeshi uthe yize kubaphathe kabi ukulahla amaphuzu bebhekene neStellies, akaboni iqembu lakhe lizophinda amaphutha afanayo uma selidlala nePirates.
“Okungiphoxile wukuthi siwulungiselele kahle umdlalo wethu neStellies siyithimba labaqeqeshi kodwa abadlali bahluleka ukuqhamuka nezimpendulo enkundleni. Uma nilahla ibhola kufanele nimake ngokushesha ukuze izitha zinganihlaseli ngesivinini. Asikwenzanga lokho, iStellenbosch yathola igoli. Sibe nenqwaba yamathuba kodwa sangawasebenzisa,” kukhala uTinkler.
“Senze amaphutha amaningi impela kodwa ngeke sibambelele kulokho manje, kufanele siqhubekele phambili. Sinomunye umdlalo ezinsukwini ezimbalwa ezizayo okufanele sigxile kuwona.
“Angicabangi ukuthi ukunqotshwa kwethu kuzoba nomthelela emidlalweni yethu ezayo. Uma nidlala imidlalo emikhulu abadlali bahlezi bezimisele, ngisho ngabe bekwenzekeni emdlalweni odlule.
“Ngokwami ngifisa sengathi bangazimisela ngalolu hlobo ngisho bedlala imidlalo emincane. Angiboni ukuthi lo mphumela uzosiphazamisa. Abadlali bazobe bekulungele ukubhekana nePirates.”
Lo mdlalo wangoMgqibelo kuzobe kungowokuqala wezikaMagebhula selokhu zigcine ukudlala owamanqamu weCarling Knockout noweCarling Cup ngoDisemba, ngaphambi kwekhefu le-Africa Cup of Nations.
Zizobe zibheke ukubuyela esicongweni se-log kulandela ukugudluzwa yiMamelodi Sundowns ngoMsombuluko, ngesikhathi inqoba i-Orbit College ngo 2-0.
AmaBrazilian aseqhwakele ngamaphuzu angu-29 emidlalweni engu-14 kanti eZimnyama zilandela ngamaphuzu angu-28 emidlaweni engu-12.
Ukukhala ngaphansi kweSekhukhune ngoLwesibili kuholele ekutheni leli qembu lehlele endaweni yesine ngamaphuzu angu-25 emidlalweni engu-14.
Kuzovuka amagqubu ePolokwane, ngoMgqibelo, kwazise iSekhukhune iyona egadle kuqala ekhanda kwiPirates, iyiqumba phansi ngo 1-0 emdlalweni weligi wokuvula isizini e-Orlando Stadium ngo-Agasti, nyakenye.