OwoSuthu uhlela ukwenza i-PSL isitebhisi samadlelo aluhlaza
INJINI entsha yaMaZulu FC avuke nayo eZimbabwe, uMason Mushore
Image: BACKPAGEPIX
INDUKU entsha yaMaZulu FC, uMason Mushore, isezinhlelweni zokuhamba ezinyathelweni zeqhawe layo ngokwenza iPremier Soccer League (PSL) isitebhisi sokufinyelela kumaligi athathwa njengamakhulu ebholeni lomhlaba.
UMushore (24) waseZimbabwe obengaconsi phansi kubalandeli beHighlanders FC, utshele Isolezwe izolo, ukuthi ukhule ebukela kuMarshall Munetsi yingakho efisa ukuhamba ezinyathelweni zakhe.
Lo mdlalo wasesiswini ozichaze njengongancengi uma esenkundleni ufisa ukusiza AmaZulu ngale ndlela ezomgqamisa ukuze ezobonwa ngamaqembu aphesheya kwezilwandle.
UMunetsi osanda kusayina kwiParis FC yaseFrance, kuphele unyaka odlule esemabhukwini eWolves yase-England. Wasuka eZimbabwe wajoyina Ubuntu Cape Town, Baroka FC ngaphambi kokudlulela kwi-Orlando Pirates, eyamvulela amadlelo aluhlaza kwiStade De Reims yaseFrance.
UMushore ukhulume neSolezwe ngesikhathi iqembu lakhe lizilungisela ukwamukela i-TS Galaxy emdlalweni weBetway Premiership ngeSonto ngo-3 ntambama, eMoses Mabhida Stadium, eThekwini.
“Ngikhule ngiyibuka i-PSL kwazise kunenqwaba yabadlali baseZimbabwe abenze kahle emaqenjini aseNingizimu Afrika kodwa kubona bonke ngizifela ngoMunetsi,” kusho uMushore oyibamba enkabeni yenkundla.
“AmaZulu ngiwazi kahle nomlando wawo yingakho ngizizwa ngihloniphekile ukuba semabhukwini awo. Ngizowafaka wonke amandla enginawo ukusiza iqembu liqede endaweni engcono kunale engilifice likuyona.
“Ngiwumdlali ozinzayo maphakathi nenkundla kodwa uma iqembu lidinga ukuthi ngishoshele anginankinga nalokho. Ngeke ngikufihle nokho ukuthi iphupho lami wukudlalela iqembu laphesheya kwezilwandle yingakho ngavumela phezulu ukujoyna iqembu le-PSL ngoba ubufakazi bokuvuleka kwamadlelo aluhlaza busobala."
Uqeqeshi woSuthu, u-Arthur Zwane, uchaze uMushore njengenkunzi yaphakathi nenkundla.
“Kusenamabhawodi okusafanele awaqinise uMushore njengokubamba umgqigqo webhola laseMzansi kodwa okuhle wukuthi naye uyakuqonda lokhu,” kusho uZwane.
“Sithole inkunzi yomdlali ekwazi ukudlala cishe yonke indawo maphakathi nenkundla. Uzosisiza futhi nasemuva ngoba uyakwazi nokudlala khona kodwa okungigqamele kakhulu kunakho konke kusukela efikile, yindlela anethezeka ngayo uma ephethe ibhola. Amaphasi awakhiphayo ayamangalisa."