UDe Jong ubhoboka ngokumdobele kwiPirates
U-ANDRE de Jong we-Orlando Pirates eziqeqesha ngaphambi kokubuya kwemidlalo yeBetway Premiership
Image: Isithombe:ORLANDO PIRATES/FACEBOOK
INDUKU entsha ye-Orlando Pirates, u-Andre De Jong, ihehwe yithuba lokuba semlandweni wokubalwa nabadlali abazosiza leli qembu laseSoweto, liqede indlala yeminyaka yesicoco seligi yeBetway Premiership.
Lo mdlali waseNew Zealand oneminyaka engu-29 ubudala okwazi ukuvala isikhala eziningi enkundleni, umenyezelwe yiPirates njengomunye eqinise ngabo esuka kwiStellenbosch ahlale kuyona amasizini amathathu.
Kusukela kuqale isizini, kunomuzwa wokuthi kulokhu iPirates inethuba lokugudluza iMamelodi Sundowns esicongweni sebhola laseNingizimu Afrika esihlale kuyona iminyaka. Leli qembu laseChloorkop seliwine isicoco seligi yePremiership amahlandla ayisishiyagalombili kulandelana.
Indlela iPirates esayinise ngayo abadlali ngaphambi kokuqala kwesizini namanje njengoba kuvuleke iwindi lokushintshana ngabo, ikhomba ukuthi leli qembu laseSoweto likhathele wukuphelezela iSundowns embangweni wesicoco.
Kubadlali iPirates eqinise ngabo kukhona uDe Jong okubeke kwacaca ukuthi ithuba layo (iPirates) lokudla isicoco seligi kulokhu lingenye yezinto ezimenze wayiqoma.
“Akekho ongawazi umlando wePirates wezinkomishi ngakho-ke isinqumo sami sokuyijoyina besingenzima kangako uma uzokhumbula ukuthi leli qembu selingishaye kangaki kweyamanqamu ngesikhathi ngisekwiStellies,” kusho uDe Jong ethimbeni lePirates labezindaba.
“Nakuba kungelula ukushintsha umoya ngoJanuwari kodwa ngikhuthazekile ukuthi ngijoyina iqembu elizongisiza ngifeze amaphupho ami amaningi.
“Ngaphandle kokuba yingxenye yeNdebe yoMhlaba kulo nyaka, ngifisa ukubalwa esikwatini sabadlali abasiza iPirates iqeda indlala yesicoco seligi."
Sekuphele amasizini angaphezu kwangu-10 iPirates yagcina ukuqukula isicoco seligi. Kwagcina kunguRuud Krol waseNetherlands ukuphakamisa le nkomishi ngesizini ka-2011/2012.
“Ngizimisele ukufaka isandla ngamagoli ukuze kuyothi uma kubalwa abadlali abaqeda indlala yesicoco seligi kwiPirates livele nelami igama.
“Ngamukelwe ngezandla ezintofontofo nokuzongenza ngisheshe ngikhululeke. IPirates ibophele bonke abadlali ongabacabanga yingakho ngingasakwazi ukulinda ukuqala ukudlala nabo,” kusho uDe Jong.
Lo mdlali owaqala ukubizelwa eqenjini lesizwe laseNew Zealand ngo-2018, lapho esedlale khona kwengu-10 inethi useyibhakuzise amahlandla amabili, unesifiso sokuba sesikwatini esiya eMexico, Canada nase-USA, ngoJuni.
INew Zealand iboshelwe ku-Group G okukhona kuwona i-Egypt, Belgium ne-Iran.