Oqede isomiso kwiChiefs ethubeni leNdebe yoMhlaba
UMQEQESHI owaxoshwa kwiKaizer Chiefs, uNasreddine Nabi, okuthiwa uxoxa neTunisia
Image: BACKPAGEPIX
UMQEQESHI oqede indlala yeminyaka yezinkomishi kwiKaizer Chiefs ngeNedbank Cup, uNasreddine Nabi, ubalwa phambili kwabangase bashayele umkhumbi weTunisia kwiNdebe yoMhlaba ngoJuni, eMexico, Canada nase-United States of America (USA).
Emuva kokuthi iTunisia iphume kwi-Last 16 ye-Africa Cup of Nations (Afcon) eqhubeka eMorocco, usoseshini wakhona ukhombe indlela, uSami Trabelsi, obeyiqeqesha kulo mqhudelwano.
ITunisia ifike kwi-Afcon ibalwa namazwe angase ahambe nesicoco kwazise ibivutha amalangabi ngesikhathi kuqhubeka imidlalo yokuhlungela lo mqhudelwano neyeNdebe yoMhlaba.
Ukuphoxeka kwiTunisian Football Federation (TFF) kubonakale ngokuthi ikhombe indlela uTrabelsi kungapheli ngisho isonto i-Carthage Eagles ikhishwe yiMali sekukhahlelwa amaphenathi.
UNabi (60) akakaze alithole iqembu kusukela ehlukane neChiefs kungalindelekile ngo-Okthoba wanyakenye.
Lo mqeqeshi uyohlala esezinhliziyweni zabalandeli beChiefs kwazise nguyena oqede isomiso sezindebe seminyaka engu-10 kuleli qembu laseNaturena.
Okungangatshazwa wukuthi kwehla kahle kwabeChiefs ngukuthi uNabi ukwenze lokhu ngokunqoba kwi-Orlando Pirates eyizimbangi ezinkulu zayo emdlalweni obuseMoses Mabhida Stadium, eThekwini, ngoMeyi nyakenye.
Amagalelo akhe kwiChiefs nakwiYoung Africans SC yaseTanzania enza uNabi abe ngomunye wabathwelwe ngeqoma kwabangase bangene esikhundleni somqeqeshi weTunisia kwazise iNdebe yoMhlaba isiseMome.
Akuyena yedwa uNabi ogaqele lo msebenzi kwazise ayavela namagama ahlanganisa elikaMouin Chabaani ogila izimanga kwiRS Berkane yaseMorocco noHussein Ammouta naye waseMorocco.
Nakuba kungaqinisekisiwe kodwa ayavela namagama ezinkakha zaseFrance okunguThiery Henry noPatrick Viera kwabagaqele lo msebenzi yize abazazi kangcono ezebhola laseTunisia, bakhomba uNabi.
Uma uNabi ewuthola lo msebenzi, kuzofanele abhukule njengoba iqoqo okuboshelwe kulona iTunisia kwiNdebe yoMhlaba ligqishe ngeJapan, Netherlands nezwe elilodwa elizophuma emidlalweni yokuhlunga ngoMashi.