Ukhonjwa phesheya umgadli ongaconsi phansi kwabePirates
UMGADLI we-Orlando Pirates, u-Evidence Makgopa, aseqale phansi amahlebezi okuthi usendleleni ebheke e-Europe
Image: BACKPAGEPIX
SIYAKHULA isibalo sabadlali abamqoka kwi-Orlando Pirates okunamahemuhemu okuthi bangase bangayiqedi isizini yeBetway Premiership ka-2025/2026, kuleli qembu laseSoweto, kulandela ukubuya kwezindaba ezithi u-Evidence Makgopa ucathanyelwa ngamaqembu adlala kumaligi aphambili e-Europe.
UMakgopa (25) ongomunye wabadlali ababizwa kuqala esikimini somqeqeshi, u-Abdeslam Ouaddou, ungene kukubi washaya igoli ngesikhathi iBafana Bafana ithwele kanzima kwiCameroon emdlalweni we-Last 16 ye-Africa Cup of Nations (Afcon) eMorocco, ngeSonto.
Njengoba iBafana isibuyele eNingizimu Afrika, aqala phansi amahlebezi akhomba emadlelweni aluhlaza lo mgadli owafika kwiPirates esuka kwiBaroka FC ngo-2022.
Imibiko esabalele ikhomba ukuthi uMakgopa ufunwa yiBristol City yase-England edlala kwiChampionship. Nokho uPaul Mitchell weSiyavuma Sports Group ophethe izindaba zakhe akazange aphumele obala kwiSolezwe ngalokhu.
“Akufihliwe ukuthi uMakgopa wayevele efunwa ngamaqembu ase-Europe ngesikhathi esuka kwiBaroka kodwa amaqembu naye bangavumelana, wagcina kwiPirates,” kusho uMitchell.
“Njengoba kuvuleke iwindi lokushintshana ngabadlali kufanele kulindelwe ukuthi abadlali abenza kahle bamataniswe namadlelo aluhlaza.
“UMakgopa ungomunye wabadlali abenza kahle nokufakazelwa yizinombolo zakhe kodwa okumqoka kunakho konke wukuthi usanda kuvuselela inkontileka yakhe nePirates.
“Ngalokhu angisho ukuthi ngeke kwenzeke lutho kumbe kukhona umnyakazo ofihliwe kodwa iqiniso wukuthi sonke sisesimweni esifanayo lapho singenalwazi ngokuzokwenzeka uma sivuka kusasa.
“Amaqembu ahlale ezama uma kuvuleke iwindi lokushintshana ngabadlali ngakho-ke kunzima ukuqinisekisa okuzokwenzeka kodwa ukhiye ulele kubanikazi (bomdlali) okuyiPirates kulokhu."
Kukhulunywa indaba yokuhamba kukaMakgopa nje, iPirates isanda kuhlukana noMbekezeli Mbokazi osejoyine iChicago Fire yase-United States of America (USA). Ngaphezu kwalokho, kuthiwa uRelebohile Mofokeng ufunwa ngamaqembu ase-Europe. Ekupheleni kwesizini edlule, eZimnyama zidayise uMohau Nkota eqenjini elidlala kwiSaudi Pro League, i-Al-Ettifaq.
Uma egcina ehambile uMakgopa, kungenzeka kuvuleke ithuba lokubuyela esikimini kuTshegofatso Mabasa onephupho lokufeza iphupho lakhe lokuphula irekhodi lamagoli kwiPirates.
UMabasa usesizwa ngendaba isikimu kweZimnyama ngaphansi kuka-Ouaddou. Emasontweni adlule, lo mqeqeshi uchaze uMabasa njengomgadli ongelona uhlobo ajwayele ukusebenza ngalo nakuba emthanda njengomdlali.
Ngaphambi kwe-Afcon, bekusobala ukuthi uMabasa onamagoli angu-50 kwiPirates kuyona yonke imiqhudelwano, ngeke alifice irekhodi langu-58 elashiywa nguBennedict “Tso” Vilakazi ngo-2007.