Kusengayakha iBafana okubhede kwi-Afcon
INDUMALO ibibhalwe ebusweni kubadlali nabaqeqeshi beBafana Bafana bekhishwa yiCameroon kwi-Last 16 ye-Afcon.
Image: BACKPAGEPIX
NAKUBA ukuphuma ekuseni kweBafana Bafana kwi-Africa Cup of Nations (Afcon) kubadumazile abalandeli abebebheke lukhulu kuyona, izifundo iqembu lakuleli elizitholile kulo mqhudelwano zingalivula amehlo njengoba selibheke eNdebeni yoMhlaba.
IBafana inqotshwe yiCameroon ngo 2-1 emdlalweni we-Last 16 kwi-Afcon ngeSonto kodwa uma sekuhlanganiswa imibiko eyenziwayo njalo ngemuva kwemidlalo nemiqhudelwano, kungaphuma izinto ezingayisiza inhlangano eyengamele ibhola kuleli, iSouth African Football Association (Safa) , umqeqeshi uHugo Broos, abadlali, nezinye izinhlaka zebhola lakuleli.
Ukuqina kwamalungiselelo
Amalungiselelo eBafana awazange ahambe ngendlela ebilindelekile kusukela ngewindi likaNovemba lemidlalo yamazwe ngamazwe. Amaqembu amaningi alisebenzisele ukudlala imidlalo emibili kodwa iBafana idlale owodwa wobungani neZambia.
Iqembu lakuleli lihlangane ekhempini ngoDisemba 8 kodwa abanye abadlali abasuka phesheya baze bahlangana nalo eMorocco, sekusele izinsuku lidlale umdlalo wokuvula ne-Angola. Lidlale umdlalo owodwa wokungcweka nesikimu esithambile saseGhana ngaphambi kokulibangisa eMorocco.
Njengoba kuzoba newindi lemidlalo yamazwe ngamazwe ngoMashi 23 kuya ku-31, nangoJuni 1 kuya ku-9, iSafa kufanele iqinisekise ukuthi ihlelela iBafana imidlalo eqinile ezonika umqeqeshi ithuba lokuzama izinto emidlalweni enzima.
UMDLALI u-Iqraam Rayners okukholakala ukuthi ubengawenza umehluko phambili kwiBafana Bafana eMorocco
Image: BACKPAGEPIX
Ukuqokwa kwesikwati
UBroos uthathe izinqumo ezimangazayo ngesikhathi eqoka isikwati sabadlali azobasebenzisa eMorocco nalabo azokhetha kubona uma kwenzeka kuba khona abalimalayo. Njengenjwayelo kuyenzeka kube nemibuzo uma kumenyezelwa isikwati ngenxa yokwehlukana kwemibono.
Ukusala kukaThemba Zwane obesanda kubuya ekulimaleni, ukungakhethwa kukaThembinkosi Lorch ongomunye wabadlali basesiswini abaphasayo, kanye nomunye wabagadli bakuleli ababukhali u-Iqraam Rayners, kukhalise abaningi futhi izikhala zabo zivelile kuyona yonke imidlalo edlalwe yiBafana kwi-Afcon yanonyaka.
Njengoba IBafana isibheke eNdebeni yoMhlaba, uBroos kufanele aqikelele ukuthi isikwati asikhethayo sinabadlali abanele kuzona zonke izindawo zenkundla. Lokhu kwenzeka kalula ngokuqoka abadlali abakwazi ukudlala ezindaweni ezehlukene, ikakhulukazi laba abasuke bengeke bayiqale imidlalo eminingi.
UMQEQESHI weBafana Bafana uHugo Broos (ngakwesokudla) nethimba lakhe labaqeqeshi
Image: BACKPAGEPIX
Amaqhinga ahambisana nabadlali
Okwenza iBafana yadlala kahle kwi-Afcon yango-2024 lapho yaqeda khona endaweni yesithathu, nasemidlalweni yokuhlungela i-Afcon neNdebe yoMhlaba, wukuthi bekucacele noma ngubani ukuthi uBroos ulihlela kanjani iqembu lakhe futhi yiluphi uhlobo lwebhola abefuna liludlale.
Ubesebenzisa kakhulu isivinini ezinhlangothini nokuwuhlobo lwebhola oluhambisana nabadlali bakuleli. Yingakho iningi labantu lixakekile uma yena lo mqeqeshi eseshintsha izinto emdlalweni womkhumulajezi neCameroon, esedlalisa abadlali ngendlela abangayijwayele.
Akulona iphutha ukuzama izinto ezihlukile, ikakhulukazi emiqhudelwaneni enzima, kodwa uma zingasebenzi lisuke lisekhona ithuba lokubuyela kulokho enikwaziyo, nokuyinto uBroos ayenze sekusele isikhathi esincane kakhulu koweCameroon.
UMOHAU Nkota ngomunye wabadlali okufanele bakhombise umqeqeshi weqembu lesizwe ukuthi baqine ngokwanele ukudlala emiqhudelwaneni emikhulu
Image: BACKPAGEPIX
Ukuzimisela kubadlali
Yize bekunenqwaba yabadlali ebiqala ukudlala emqhudelwaneni omkhulu njenge-Afcon, lokho ngeke kube yizaba kwazise akhona namanye amazwe anabadlali abasebasha kodwa abakwazile ukukhuphula izinga enkundleni.
Abadlali abebenikwe amathuba bangawasebenzisa ngendlela efanele banenselelo yokukhombisa umqeqeshi ezinyangeni ezizayo ukuthi bazimisele ukuba ngamasosha angcono eNdebeni yoMhlaba.
Lokho bazokuveza emidlalweni abazoyidlalela amaqembu abo nabazoyidlalela iqembu lesizwe ngaphambi komqhudelwano ozoba seMexico, Canada nase-United States.