OweCameroon ubona ingcindezi ikwiBafana kowe-Afcon

UMQEQESHI weCameroon, uDavid Pagou, ukholwa wukuthi ingcindezi izobe ikwiBafana Bafana uma sebehlangana koweLast 16 we-Africa Cup of Nations ngeSonto.

Umdlalo uzoqala ngo-9 ebusuku e-Agdal Medina Stadium esedolobheni iRabat, eMorocco.

Nakuba i-Indomitable Lions isike yaba ngompetha bezwekazi amahlandla amahlanu, kanti iBafana isayinqobe kanye i-Afcon, uPagou ukholwa wukuthi iqembu lamanje laseNingizimu Afrika lithe ukuqina.

Kwi-Afcon edlule iBafana Bafana yaqeda endaweni yesithathu, iCameroon yakhishwa yiNigeria kwiLast 16.

IBafana iphinde yazibekisela indawo eNdebeni yoMhlaba ezobanjelwa e-United Stades, Mexico naseCanada kulo nyaka, nokuyinto iCameroon ehlulekile ukuyenza.

Esigabeni samaqoqo kule-Afcon iCameroon inqobe iGabon ngo 1-0, yabambana ngo 1-1 ne-Ivory Coast ngaphambi kokuhlula iMozambique ngo 2-1.

IBafana idlule ngokuguqisa i-Angola ngo 2-1, yanqotshwa yi-Egypt ngo 1-0, yaphinde yahlula iZimbabwe ngo 3-2.

UPagou, onikwe izintambo sekusele amasonto kuqale i-Afcon, uthe iqembu lakhe alikahlangani njengeBafana.

“INingizimu Afrika idlale kahle kakhulu emdlalweni wayo odlule. Inabadlali abazanayo njengoba iningi labo lidlala kwiligi eyodwa. Kade baqala ukudlala ndawonye. Yiqembu elizosidalela izinkinga,” kusho uPagou.

“Ngicabanga ukuthi ingcindezi izobe ikubona. Iqembu lethu sisalakha. Sisachithe amasonto ambalwa ndawonye. Silindele umdlalo onzima ngenxa yokuqina kweqembu leNingizimu Afrika nomqeqeshi uHugo Broos, engikholwa wukuthi ungumqeqeshi osezingeni eliphezulu.

“Wanqoba i-Afcon neCameroon kungalindele muntu futhi ngikholwa wukuthi kuzovuka namagqubu ngoba wadedelwa engakathandi ukushiya iqembu lesizwe laseCameroon.”

UBroos wanqoba isicoco se-Afcon neCameroon ngo-2017 kodwa waxoshwa kusadlule izinyanga ezingu-10 ngemuva kokuthi ehlulekile ukufaka i-Indomitable Lions eNdebeni yoMhlaba eyayibanjelwe eRussia ngo-2018.