UHunt wethembise ukuguqula isimo asifice kwiStellenbosch
UMQEQESHI omusha weStellenbosch FC uGavin Hunt
Image: STELLENBOSCH FC
OMUNYE wabaqeqeshi abahlonishwayo ebholeni laseNingizimu Afrika, uGavin Hunt, wethembise ukusiguqula ngokushesha isimo asifice kwiStellenbosch FC kulandela ukuqinisekisa kwaleli qembu laseKapa ngesitatimende izolo ekuseni ukuthi useyinhloko kulona.
IStellies esanda kuhlukana nomqeqeshi obesehlale iminyaka, uSteve Barker oseqeqesha iSimba FC yaseTanzania, ivale isikhala sakhe ngoHunt naye osanda kuhlukanisa neDurban City.
Nakuba iStellenbosch iqhwakele eqoqweni layo leCaf Confederation Cup emuva kwemidlalo emibili kodwa ifomu kwiBetway Premiership iyona egcine iphoqa ukuthi uBarker ahlukanise naleli qembu abeselakhele isithunzi ebholeni laseNingizimu Afrika.
Kule sizini iStellenbosch isawine imidlalo yeligi emithathu kwengu-14. Isendaweni ka-14 kwi-log ngamaphuzu angu-12.
Nakuba kubukeka sengathi kunzima kwabaningi kodwa uHunt uthe ubona ingqayizivele yethuba lokusebenza neqembu eselivele lakhelwe phezu kwesisekelo esiqinile.
“Okuhle obekwenziwa yiStellenbosch ngikwazi ngokukubukela kude kodwa akuzange kungithathe isikhathi eside ukwamukela ukusebenza kuleli qembu,” kusho uHunt esitatimendeni esikhishwe yiStellies.
“Ngabe ngikhuluma iphutha uma ngithi kuzoba lula kodwa ngenxa yesisekelo esishiywe nguSteve (Barker) okuningi ngeke kuthathe isikhathi eside ukuthi sikuqondise,” kusho uHunt.
Ngaphandle kokuphendula iStellenbosch elinye lamaqembu asatshwayo eMzansi okufakazelwa nawukudla isicoco seCarling Knockout ngesizini edlule, uBarker ubaphendule inyama abadlali abaningi baleli qembu abagcine bethengwa yizinkunzi zePremiership.
Kulaba badlali singabala u-Ashley du Preez, Zitha Kwinika, Sibongiseni Mthethwa, Iqraam Rayners, Jaydon Adams, Fawaaz Basadien, Sihle Nduli noDeano van Rooyen bonke abakwiKaizer Chiefs, Mamelodi Sundowns ne-Orlando Pirates ngokwahlukana.
Umdlalo wokuqala weligi weStellies emuva kwe-Africa Cup of Nations (Afcon) okuzoba ngowokuqala kaHunt, usekuhambeni neSekhukhune United ngoJanuwari 20 ePeter Mokaba Stadium, ePolokwane.