IBafana ifuna ukubhukula kowe-Last 16 we-Afcon

OMUNYE wabadlali beBafana Bafana okuthenjelwe kubona kodwa osohlwini lwabangakafiki ezingeni ebelilindeleke ngaphambi kokuqala kwe-Africa Cup of Nations (Afcon), uTeboho Mokoena, wethembisa unyawo oluhlukile njengoba umqhudelwano usungena kuvuthondaba eMorocco.

Nakuba iBafana iqede endaweni yesibili ku-Group B okuyidlulisele kwi-Last 16 ye-Afcon kodwa abadlali, abalandeli nethimba labaqeqeshi kabeneme ngefomu yaleli qembu lesizwe kulo mqhudelwano.

Kuyona yomithathu imidlalo yamaqoqo, iBafana ingenelwe ngamagoli yize inqobe emibili (Angola neZimbabwe) yaguqiswa yi-Egypt komunye.

Leli qembu eliphekwa nguHugo Broos lifike eMorocco lilikhulu isasasa kulaba abalilandelayo ngenxa yobuqhawe ebelilokhu libukhombise njalo kusukela laqeda endaweni yesithathu kwi-Afcon yase-Ivory Coast.

Abadlali okubalwa kubona ukaputeni, uRonwen Williams, Siyabonga Ngezana, Mohau Nkota, Broos, Mokoena nabalandeli beBafana ezinkundlani zokuxhumana bayavumelana ngokuthi kunesidingo sokukhuphula izinga ngokushesha uma leli qembu lingazimisele ngokuwasha ijezi esigabeni se-Last 16.

“Kuliqiniso ukuthi ifomu yeqembu ayikho lapho sifuna ibekhona kodwa okuhle wukuthi sidlulele esigabeni esilandelayo somqhudelwano,” kusho uMokoena ethimbeni lezindaba leSouth African Football Association (Safa).

“Zonke izinkinga esinazo kusukela ekungenelweni ngamagoli ngokweqile kuya ekwehlelweni yifomu kufanele sikukhohlwe ngoba ngokwethu umqhudelwano yima uqala.

“Alikho izwe esibona kungcono ukuligwema kwi-Last 16, ngakho-ke sikulungele ukuthwalisa kanzima ngisho ngabe ngubani obekwa phambi kwethu."

IBafana ibuyela enkundleni ngeSonto lapho izobhekana noyedwa phakathi kwe-Ivory Coast, Cameroon neMozambique.

Kuzocaca (ngoLwesithathu) ebusuku ukuthi usongwa kanjani u-Group F lapho izwe elizoqeda kuwona lilele isibili lizobhekana nezikaBroos ngeSonto ntambama, eRabat.