IBafana Bafana idlulele kwi-Last 16 ye-Afcon
ABADLALI beBafana Bafana bejabula noTshepang Moremi oyishayele igoli lokuqala ngesikhathi ibhekene neZimbabwe emdlalweni wokugcina wesigaba samaqoqo se-Africa Cup of Nations (Afcon) eMarrakech Stadium, eMorocco, ngoMsombuluko
Image: Isithombe:BACKPAGEPIX
IBAFANA Bafana izibekisele indawo kwi-Last 16 ye-Africa Cup of Nations (Afcon) ngemuva kokwehlula iZimbabwe eMarrakech Stadium, eMorocco, ngoMsombuluko ebusuku.
Amagoli aweze iBafana ashaywe nguTshepang Moremi, Lyle Foster no-Oswin Appollis obekuyiphenathi sekuyophela umdlalo. AweZimbabwe ashaywe nguTawanda Maswanhise no-Aubrey Modiba okube wumkhonto ogwaze ekhaya.
Abafana bakaHugo Broos baqede endaweni yesibili ngamaphuzu ayisithupha kuGroup B. I-Egypt ebambane ngo 0-0 ne-Angola emdlalweni wokugcina, iqede eqhulwini ngayisikhombisa. Ukuhlulwa kweZimbabwe yiBafana nokuphuma nephuzu kwe-Angola kwi-Egypt kusho ukuphela kwendlela yabo kwi-Afcon.
IBafana idlulele kwi-Last 16 ye-Afcon okwehlandla lesishiyagalombili kulandelana. Ijoyine ezinye izinkunzi zase-Afrika eziyizimfivilithi kulo mqhudelwano okubalwa kuzona i-Egypt, Nigeria ne-Algeria. Amaqembu amabili azoqeda eqhulwini emaqoqweni ayisithupha azojoyinwa ngamane azoqeda kangcono endaweni yesithathu ukuze kuphume angu-16 azoqhuthana emzuliswaneni olandelayo.
Emdlalweni weZimbabwe, uBroos ubuyisele esikimini uSipho Mbule ongawuqalanga owe-Egypt kwazise indawo yakhe ibithathwe nguThalente Mbatha. Nakuba iBafana iqale kahle, yathola igoli ngokushesha ngonyawo lukaMoremi kodwa kusheshe kwacaca ukuthi izothwala kanzima kwiZimbabwe. Lokho kufakazelwe wukuphendula kweWarriors ngokushesha ngegoli lukaMaswanhise oqede ngodonga lwasemuva lweBafana, walibeka phakathi.
Esiwombeni sesibili, uBroos ubuye esekhiphe uSiphephelo Sithole, wafaka uBathusi Aubaas. Lokhu kusiqinise kakhulu isisu seBafana, ephinde yabekwa phambili nguFoster ngekhanda zisanda kubuya ekhefini. Emuva kwemizuzu embalwa, unozinti weBafana uRonwen Williams uvimbe ngonyawo ibhola elibi ebelishaywe nguMaswanhise kodwa lashaya ebusweni bukaModiba, langena phakathi. IBafana igcine ilanyulelwe ngu-Appollis obeke phakathi iphenathi edaleke emuva kokuthi uMarvelous Nakamba echithele ngaphandle ngesandla ibhola esebhokisini.
Nakuba iBafana iwinile kodwa kucacele nekhasela eziko ukuthi kufanele ibhukule uma izimisele ngokuhamba ibanga elide kwi-Afcon.