Kuphele ngerekhodi leBafana ihlulwa yi-Egypt kowe-Afcon
ISITOBHA seBafana Bafana, uMbekezeli Mbokazi, siphenduka phambi kukaMo Salah emdlalweni we-Africa Cup of Nations (Afcon) e-Ardar Stadium, eMorocco. ngoLwesihlanu
Image: Isithombe:BACKPAGEPIX
KUGCINE kuphelile ngerekhodi leBafana Bafana lokungehlulwa leminyaka emibili ngesikhathi ikhala ngaphansi kwi-Egypt emdlalweni wesibili wesigaba samaqoqo kwi-Africa Cup of Nations (Afcon) eMorocco ngoLwesihlanu ntambama.
IBafana ingene enkundleni, i-Adrar Stadium, e-Agadir, ibheke ukuqoqa amaphuzu amathathu abezoyibeka esicongweni sikaGroup B kwazise ibilingana ngamathathu ne-Egypt. Nokho igcine ikhale ngaphansi ngo 1-0 wephenathi kaMo Salah ayishaye esiwombeni sokuqala.
Le phenathi idaleke ngokudlaliswa kabi kukaSalah nguKhuluso Mudau obeke isandla ebusweni balo mgadli weLiverpool besebhokisini. Amapuhuzu amathathu atholwe yi-Egypt ayibeke esicongweni kuGroup B ngayisithupha. Ilandelwe yiBafana ngamathathu ewathole yehlula i-Angola emdlalweni wokuqala. IZimbabwe ne-Angola banephuzu iqembu ngalinye kulandela ukudlala ngokulingana ngo 1-1 emdlalweni odlale ngaphambi koweBafana ne-Egypt.
Ukwehlulwa kweBafana yi-Egypt kusho ukunqamuka komgqigqo wemidlalo engu-26 ingahlulwa. Leli qembu laseNingizimu Afrika belilokhu lagcina ukuthola isibhaxu kwiMali emdlalweni wokuvula we-Afcon ka-2023 e-Ivory Coast.
Enkundleni, iBafana iqale kahle ibukeka izomelana nengcindezi ye-Egypt ehlasele zibekwa kodwa ibihluleka ukuphatha ibhola futhi kunzima ukufika phambili. Izinto zishintshe ngesikhathi i-Egypt ithola iphenathi. Kuyiwe ekhefini i-Egypt ingasaphelele kulandela ukuthola ikhadi lesibili eliphuzi kukaMohamed Hany ngenxa yokudlalisa kabi uTeboho Mokoena.
Esiwombeni sesibili, umqeqeshi weBafana uHugo Broos, wenze izinguquko efaka uSipho Mbule endaweni kaThalente Mbatha. Emuva kwalokho, iBafana iqalile ukuthola izikhala, yaphatha ibhola. Nokho ibihluleka ukugqobhoza udonga lwe-Egypt ebisihlezi emuva. Kusuke umsindo umdlalo usuyophela umdlalo ngesikhathi ibhola lishaya esandleni somdlali we-Egypt ebebambelela phansi, wavimba ibhola likaMokoena. Emuva kwesikhathi, unompempe ubheke i-VAR, iBafana yagcina ingayitholanga iphenathi.
Emdlalweni wokugcina wamaqoqo, iBafana izobhekana neZimbabwe eMarrakesh Stadium ngoMsombuluko ngo-6 ntambama. Ngaleso sikhathi i-Egypt izosonga ne-Angola e-Adrar Stadium. Amaqembu amabili azoqeda phezulu kuwona wonke amaqoqo, azohlanganiswa namane azoqeda kangcono endaweni yesithathu, adlulele kwi-Last 16.