Kunxenxwa abeChiefs ngokweseka iBafana kwi-Afcon
ISIKHULU seKaizer Chiefs uJessica Motaung sikhumbuze abalandeli baMakhosi ngokubaluleka kokweseka iBafana Bafana kwi-Afcon
Image: SIGCINIWE
ESINYE sezikhulu zeKaizer Chiefs, uJessica Motaung, sifongqe isigqoko ezigidini zabalandeli baMakhosi ngokubaluleka kokwesekwa kweBafana Bafana njengoba izoqala i-Africa Cup of Nations (Afcon) ngomdlalo ka-Group B ne-Angola ngoMsombuluko ngo-7 ebusuku eGrande Stade de Marrakech, eMorocco.
UMotaung oyi-Director for Marketing & Commercial kwiChiefs ukusho lokhu ngesikhathi ekhuluma emcimbini weFifa othinta abesifazane abasejele laseGoli (Johannesburg Correctional Center, eSun City) ngasekuqaleni kwesonto.
Njengoba iBafana iya kwi-Afcon kunzima ukuziba umsindo wabalandeli beChiefs abathize abafafaza ivangeli lenzondo kuBroos neqembu lakhe ezinkundleni zokuxhumana.
Bagxeka lo mqeqeshi ngokukhuluma kabi ngeChiefs nokushaya ngesithende abadlali bayo uma ehlanganisa iqembu lakhe.
Nakuba bebebahlanu abadlali beChiefs esikwatini sikaBroos sabangu-55 aqoke kusona esiya kwi-Afcon kodwa akukho noyedwa kwabaya eMorocco. UMduduzi Shabalala okwabathathu okucushwe ngabo.
Okunye okubukeka kubhebhezelisa le nzondo yeBafana ukuthi isikwati sikaBroos sigqishe ngabadlali abayisishiyagalolunye be-Orlando Pirates nabayisihlanu beMamelodi Sundowns okuyizimbangi ezinkulu zaMakhosi.
“Ngiyazicelela kubantu baseNingizimu Afrika ukuba bangayeki ukukholelwa kuleli qembu lesizwe ngoba lingelethu sonke futhi elikwenzayo likwenzela bonke abaxhumene nezwe lethu,” kusho uMotaung.
“Lo myalezo ngiwuthumela nakubalandeli beChiefs ngobuningi babo kuwona wonke amagumbi omhlaba. Ngizobe ngimemeza kuze kushe izwi kwazise ngizobe ngikhona kwi-Afcon.
“Imiphumela yeBafana yakamuva kufanele isenze sihambe size siziqhenye, ngakho-ke ngifongqa isigqoko kubona bonke abaxhumene neNingizimu Afrika ngokwahlukana kwezinhlanga namaqembu ebhola ukuba bayeseke ngakho konke abanakho njengoba iqala uhambo lwe-Afcon."
Emuva komdlalo wokuvula umqhudelwano ne-Angola, iBafana izobhekana ne-Egypt kowaleli qoqo obhekwe ngabomvu ngoDisemba 26 e-Adrar Stadium, e-Agadir.
IBafana izosonga u-Group B ngowomakhelwane iZimbabwe ngoDisemba 29 eMarrakech.