‘Amakhehla’ anomlando kwi-PSL azohlobisa i-Afcon
INKAKHA kanozinti weMamelodi Sundowns, uDenis Onyango, ozobe ivimbele i-Uganda kwi-Afcon
Image: BACKPAGEPIX
‘AMAKHEHLA’ anomlando omude wokudla isicoco namaqembu ahlukene kwiPremier Soccer League (PSL) kulindeleke ukuba akhathule indima ebonakalayo emazweni awo njengoba kuqala i-Africa Cup of Nations (Afcon) ngeSonto, eMorocco.
Umdlali waseMozambique owake wawina umklomelo wePSL Footballer of The Season, u-Elias Domingues Pelembe (42), nguyena omdala kunabo bonke ngokweminyaka kulo mqhudelwano ovulwa yiMorocco neComoros ngeSonto.
Ngaphandle kukaPelembe ohlale iminyaka kwi-PSL, kulo mqhudelwano kukhona nonozinti we-Uganda uDenis Onyango (40) noweZimbabwe, uWashington Arubi (40).
UPelembe osedlalela i-UD Songo eMozambique, uhlanganise iminyaka engu-42 ngenyanga edlule. Usesikwatini seMozambique okubhekwe ukuthi senze kangcono kwi-Afcon yanonyaka. Lokhu kumbeka ethubeni lokusuka endaweni yesithathu ahlale kweyesibili, alingane noMohamed Lawal waseNigeria kwabadlale i-Afcon seludlulile usuku lwabo lokuzalwa lwehlandla lika-42.
UPelembe noLawal balandela uqweqwe lukanozinti wase-Egypt, u-Essam El Hadary, olwadlala kwi-Afcon yokugcina ngo-2017, seluneminyaka engu-44 ubudala.
Kalidingi ukuchazwa igama likaPelembe kubathandi bakanobhutshuzwayo waseNingizimu Afrika kwazise uyohlale esemlandweni njengomuye wabadlali abadla isicoco seligi neMamelodi Sundowns, SuperSport United neBidvest Wits ngokwahlukana.
IMozambiaque iku-Group F obukeka unzima kwazise ubophele ne-Ivory Coast, Gabon neCameroon.
U-Onyango ongunozinti weMamelodi Sundowns, uzobhekana neNigeria, Tunisia neTanzania kuGroup C.
UKAPUTENI weMozambique, u-Elias Domingues Pelembe, ozobe engumdlali omdala kunabo bonke kwi-Afcon
Image: BACKPAGEPIX
U-Onyango ongumdlali osehlabane ngesicoco seligi yaseNingizimu Afrika ukubedlula bonke emlandweni, kulindeleke ukuthi azibonakalise kulo mqhudelwano kwazise nesipiliyoni sokudlala e-Afrika unaso sonke njengoba eseke wawina neCaf Champions League (2016).
Kusukela u-Onyango afika eNingizimu Afrika, usesidle amahlandla angu-12 isicoco seligi, wengeza ngeTelkom Knockout ezimbili, ese-MTN8 neNedbank Cup.
Ngaphandle kweSundowns, u-Onyango wagqama nakwiSuperSports azidla nayo izicoco waphinde waziveza nakwiWits neMpumalanga Black Aces.
Nakuba u-Arubi engenawo umlando ofana noka-Onyango noPelembe kwi-PSL kodwa lo nozinti ogijima kwiMarumo Gallants igama lakhe laziwa cishe yibona bonke abalandela unobhutshuzwayo waseMzansi.
Ngaphandle kweNedbank, kawukho omunye umqhudelwano aseke wawuwina kodwa amagalelo akhe ambeka nabaphambili kwabake bavimba kwi-PSL.