Kubhekwe indumezulu ye-Afcon eMorocco
ISETHENJWA seMorocco, u-Achraf Hakimi, esifakiwe esikwatini se-Afcon yize sibuya ekulimaleni.
Image: BACKPAGEPIX
KULINDELWE ukuthi ube sezingeni elicokeme umqhudelwano wanonyaka we-Africa Cup of Nations (Afcon) ozobanjelwa eMorocco, kusukela ngeSonto kuya kuJanuwari 18.
Leli lizwe elisenyakatho ne-Afrika lanikwa igunya lokusingatha lo mqhudelwano ngoSepthemba ka-2023, lithatha indawo yeGuinea okwatholakala ukuthi iyahluleka ukuwulungiselela ngendlela efanele.
Kuzobe kungokwesibili i-Afcon idlalelwa eMorocco selokhu yagcina ngo-1988. Nokho, miningi imiqhudelwano emikhulu esanda kudlalelwa kuleli zwekazi okubalwa kuyona iWomen’s Africa Cup of Nations ka-2022 neyanonyaka, iCaf Women’s Champions League ka-2022 neyango-2024 ne-Afcon ka-Under-17 yanonyaka.
I-PRINCE Moulay Abdellah Stadium eseRabat, esanda kulungiswa, iyona okuzodlalelwa kuyona umdlalo wamanqamu we-Afcon yanonyaka.
Image: FACEBOOK
Izinkundla
Imidlalo izodlalelwa ezinkundleni eziyisishiyagalolunye ezisemadolobheni ayisithupha ahlukene aseMorocco. Imidlalo ezodlalelwa ekomkhulu, iCasablanca, izoba seMohammed V Stadium, eyase-Agadir ibe se-Adrar Stadium, eMarrakech kuzosetshenziswa iMarrakech Stadium, bese edolobheni iFez kudlalelwe eFez Stadium.
Idolobha iRabat yilona elinezinkundla ezithe xaxa njengoba kuzodlalelwa eMoulay Hassan Stadium, Olympic Stadium nase-Al Medina Stadium, bese umdlalo wokuvula nowamanqamu ube sePrince Moulay Abdellah Stadium, emumatha abantu abangu-68 700.
INDEBE ezobangwa amaqembu angu-24 azodlala kwi-Afcon yanonyaka eMorocco.
Image: FACEBOOK
Amaqembu
Indebe izobangwa ngamazwe angu-24 asemaqoqweni ayisithupha anamaqembu amane ngalinye. Amazwe amabili azohamba phambili eqoqweni ngalinye azozibekisela izindawo kwiLast 16, ehambisana namane azolala isithathu ngamaphuzu angcono emaqoqweni awo.
Nakuba iMorocco yagcina ukuba ngompetha base-Afrika ngo-1976, kodwa ibalwa namaqembu asethubeni lokuphakamisa indebe njengoba izobe idlalela ekhaya futhi ingelinye lamazwe ase-Afrika abedlala kahle eminyakeni emine edlule.
I-Ivory Coast izofika nenhloso yokuvikela indebe eyinqobele ekhaya ngasekuqaleni konyaka odlule, iguqisa iNigeria kowamanqamu.
ININGIZIMU Afrika ingelinye lamazwe angu-12 aseke aba ngompetha base-Afrika azolwela isicoco se-Afcon.
Image: BACKPAGEPIX
Ngaphandle kwalawa mazwe, angu-10 amanye ake aba ngompetha bezwekazi azobe eyingxenye yalo mqhudelwano okubalwa kuwona i-Egypt esaphethe irekhodi lezicoco eziyisikhombisa.
Amanye ayiqukula le ndebe azobe ezama ukubuyela nayo ekhaya yiCameroon, Nigeria, Algeria, Democratic Republic of Congo, Senegal, Tunisia, Sudan, Zambia neNingizimu Afrika.
Alikho izwe elizobe liqala ukudlala kwi-Afcon kulo nyaka kodwa iBotswana neComoros yibona ababalwa namazwe angenaso isipiliyoni kwazise bazobe bedlala okwesibili kuwona.
IBotswana neSudan bakhuze ibuya ngemuva kweminyaka engu-13 bengabonakali kulo mqhudelwano selokhu bagcina ukudlala ngo-2012, kowawubanjelwe e-Equatorial Guinea naseGabon.
IBHOLA elaziwa nge-ITRI elikhiqizwe yinkampani iPuma elizosetshenziswa kwi-Afcon yanonyaka.
Image: FACEBOOK
Abadlali
Njengoba abadlali base-Afrika bethe cithi saka kumaligi aphezulu emhlabeni jikelele, baningi okuzobe kubhekwe ukuthi basize amaqembu abo ukuthi emuke nendebe nezindondo zegolide. Kubona kubalwa u-Achraf Hakimi waseMorocco odlalela iParis Saint-Germain, oqokwe njengomdlali ovelele e-Africa kumaCaf Awards anonyaka.
Nakuba lo mdlali esanda kubuya ekulimaleni kodwa kubhekwe ukuthi abe ngumdlali omqoka kosokhaya ngenxa yekhono lakhe lokumaka aphinde ahlasele ngakwesokudla.
Kwabadle lo mklomelo eminyakeni yakamuva futhi abasayizethenjwa zamaqembu abo kukhona uVictor Osimhen no-Ademola Lookman base-Nigeria, uSadio Mane waseSenegal, uMohamed Salah wase-Egypt nabanye.
Angu-24 amaqembu azobanga isicoco se-Afcon eMorocco.
Image: CAF
Amaqoqo e-Afcon ka-2025
Group A: Morocco, Mali, Zambia, Comoros
Group B: Egypt, South Africa, Angola, Zimbabwe
Group C: Nigeria, Tunisia, Uganda, Tanzania
Group D: Senegal, DR Congo, Benin, Botswana
Group E: Algeria, Burkina Faso, Equatorial Guinea, Sudan
Group F: Ivory Coast, Cameroon, Gabon, Mozambique