ISharks igqemeke ingozi ngokumiswa kuka-Etzebeth
UZOHLALA izinyanga engadlali ngenxa yokumiswa umdlali wamaBhokobhoko neHollywoodbets Sharks u-Eben Etzebeth
Image: Isithombe:BACKPAGEPIX
UZOZE abuyele enkundleni ngo-Ephreli umdlali weHollywoodbets Sharks namaBhokobhoko, u-Eben Etzebeth, kulandela ukumiswa kwakhe imidlalo engu-12.
Uthole lesi sigwebo ngemuva kokukhishwa ngekhadi elibomvu ngesikhathi amaBhokobhoko ebhekene neWales ngempelasonto edlule. Ubonakale kwi-video efaka isithupha sakhe esweni lomdlali weWales, u-Alex Mann.
Ikomiti eliqondisa ubugwegwe libukisise i-video lamthola enecala. Uqale wagwetshwa imidlalo engu-18 kodwa yancishiswa ngenxa yerekhodi elihle lokuziphatha. Uzophuthelwa yinqwaba yemidlalo okubalwa kuyona eyisishiyagalombili ye-United Rugby Championship nemine ye-European Champions Cup.
Ngesikhathi enikwa ithuba lokuzikhulumela, u-Etzebeth uthe wayengaqondile ukusondeza umunwe esweni likaMann kodwa wayezama ukumqhelisa ngesikhathi behilizisana. AmaBhokobhoko ngeke aphazimiseke ngokumiswa kwakhe njengoba ezoqala ukudlala ngoJulayi. Inkontileka ka-Etzebeth neSharks izophela ngo-2027. Leli qembu aliyiqalanga kahle isizini kwi-URC lapho lihlezi khona ngasemsileni. Kule mpelasonto, lizoqala iChampions Cup ngokubhekana neToulouse eStade Ernest-Wallon kusasa ngo-5.15 ntambama.