INapoli iseza kahle kwiSerie A yize kulimele izethenjwa
UMDLALI wasesiswini weNapoli uScott McTominay.
Image: FACEBOOK
INAPOLI izoya emdlalweni wakusasa weSerie A neJuventus ihlose ukuzigcina endaweni enhle embangweni wesicoco.
Umdlalo uzoqala ngo-9.45 ebusuku enkundleni yeNapoli, iDiego Armando Maradona Stadium.
INapoli, okuyiyona evikela isicoco seligi, isendaweni yesibili kwi-log ngamaphuzu angu-28 emidlalweni engu-13. Inamaphuzu alinganayo neqembu eliqhwakele, i-AC Milan.
IJuventus isendaweni yesikhombisa ngamaphuzu angu-23 kanti nayo iyawadinga amaphuzu ukuze ikwazi ukusondela emaqenjini ahamba phambili okubalwa kuwona ne-Inter Milan neRoma, abanamaphuzu angu-27.
Ukukhuphuka kweNapoli kuxhaswe ngabadlali abasuka kwiPremier League yase-England, okubalwa kubona uKevin De Bruyne, Scott McTominay noRasmus Højlund.
Laba badlali bebengasadingeki emaqenjini abebewadlalela eManchester kodwa bafike kwezwakala edolobheni iNaples.
Nakuba uDe Bruyne engeke adlale kusasa ngenxa yokudonseka umsipha osethangeni ngenyanga edlule, uMcTominay noHøjlund kulindeleke ukuthi basize leli qembu lika-Antonio Conte.
INapoli inqobe iRoma ngo 1-0 ekuhambeni emdlalweni wayo wakamuva weligi, okukhombise ukuthi isakwazi ukuthatha amaphuzu emaqenjini ebanga nawo isicoco.
IJuventus iguqise iCagliari ngo 2-1 kowakamuva weligi, okuwumphumela oyinikeze amaphuzu abalulekile ngemuva kokudlala ngokulingana imidlalo emithathu ilandelana.
UMGADLI osemncane weJuventus uKenan Yildiz.
Image: FACEBOOK
ULuciano Spalletti onikezwe izintambo kwiJuventus ngo-Okthoba kulandela ukuxoshwa kuka-Igor Tudor ngenxa yemiphumela engemihle, ukholwa wukuthi iqembu linakho elikudingayo ukulwela isicoco.
"Ngikholwa wukuthi sizokwazi ukubuyela embangweni wesicoco. Miningi imidlalo esele. Ukube bengingakholelwa kulaba badlali bengingeke ngiwuthathe lo msebenzi. Sengiqeqeshe iminyaka engaphezu kuka-30 futhi sengibone izinto ebholeni. Okumqoka wukuthi abadlali bakholwe futhi siqale ukukhuphuka kwi-log," kusho uSpalletti ecashunwa yi-ESPN.
Khonamanjalo, iNapoli kumele ibhukule yize ilinyalelwe yinqwaba yabadlali abamqoka okubalwa kubona uDe Bruyne, Billy Gilmour, Romelu Lukaku no-Andre-Frank Zambo Anguissa.
UConte uthe uzoqhubeka nokusebenzisa abadlali abafana noMcTominay noStanislav Lobotka ezindaweni ezahlukene ukuze basize iqembu lithole imiphumela emihle.
"Kufanele sishintshe indlela esizihlela ngayo. Sino-Lobotka noMcTominay kuphela enkabeni yesisu. Laba badlali bakhombisa umdlandla nokuzimisela nsuku zonke. Yilokho okwenze sibe ngompetha ngesizini edlule. Sizozama ukusivikela isicoco futhi sithemba ukuthi ngeke kusalimala abanye abadlali.”
Ngesizini edlule iNapoli yayiqumba phansi ngo 2-1 iJuventus kulo mdlalo kwathi owadlalelwa enkundleni yeJuventus waphela zibambene ngo 0-0.