OweChiefs ukhale ngamahlalakhona bebanjwa yiChippa
U-ASANELE Velebayi weKaizer Chiefs ubeyicela kanje indlela kubadlali beChippa United emdlalweni ezigcine zicazelane amaphuzu kuwona eNelson Mandela Bay Stadium, eGqeberha, ngoLwesithathu ebusuku
Image: Isithombe:BACKPAGEPIX
UKHALE ngamahlalakhona eKaizer Chiefs omunye wabaqeqeshi, uBen Khalil Youssef, ezakhe zibanjwa yiChippa United emdlalweni weBetway Premiership eNelson Mandela Bay Stadium, eGqeberha, ngoLwesithathu ebusuku.
Amakhosi abambane neChili Boys ngo 0-0 emdlalweni obekubhekwe ukuthi azoqoqa amaphuzu amathathu kuwona, ifake ingcindezi emaqenjini asezihola phambili kwi-log yePremiership okuyiMamelodi Sundowns ne-Orlando Pirates osekucacile ukuthi izovala unyaka iqhwakele.
Nokho ukuhluleka ukusebenzisa amathuba phambi kwamapali kuphinde kwayicekela phansi iChiefs, ikakhulukazi esiwombeni sesibili. Lo mkhuba sebekhale ngawo kakhulu abaqeqeshi naMakhosi, kusukela kusekhona uNasreddine Nabi.
Ukuhluleka kweChiefs ukubuya namaphuzu, kuhambisane nokubanjwa kweMamelodi Sundowns yiSiwelele ngo 1-1 eBloemfontein. Le miphumela yomibili iweze ngelibanzi iPirates evule igebe lamaphuzu amabili esicongweni se-log.
UYoussef, oqeqesha iChiefs ngokubambisana noCedric Kaze, uthe ukwehlulwa ngamagoli yikhona okwenze bagcina bephuma nephuzu kungafanele kwiChippa esemsileni we-log.
"Siyayibongela iChippa, ibinohlaka oluhle futhi ibilwela wonke amabhola. Ngasohlangothini lwethu, akukho esingakhala ngakho. Uma uthola amathuba amaningi okubhekana nonozinti kodwa ungawasebenzisi (akulungi), ibhola linjalo. Kufanele siqhubeke nokusebenza sizame ukulungisa inkinga eyodwa esinayo. Siyafika phambili kodwa siyahluleka ukushaya amagoli. Yileyo inkinga esinayo kodwa kufanele siqhubeke sisebenze,"usho kanje kwiSupersport.
Nokho iChiefs isenalo ithuba lokulungisa isimo njengoba izobhekana neTS Galaxy emdlalweni wePremiership wokugcina wonyaka eMbombela Stadium, eNelspruit, ngeSonto ngo-3.30 ntambama.