Kungase kuphenduleke imibuzo yabeChiefs ngoChislett

BATHENJISWE ukubona u-Ethan Chislett abalandeli beKaizer Chiefs uma isibhekene neChippa United ngo-7.30 ebusuku emdlalweni weBetway Premiership eNelson Mandela Bay Stadium, eGqeberha.

UChislett (27) ufike kwiChiefs ekuqaleni kwesizini kodwa akaze abonakale enkundleni edlubhe ijezi laMakhosi. Nokho ngokusho kwelinye lamabamba abaqeqeshi, uCedric Kaze, lokhu kungase kuphele kowakusasa abazowudlala neChili Boys ebambe ibhuleki kwi-log yePremiership.

Ukungabonakali kukaChislett osayine kwiChiefs esuka kwiPort Vale edlala kuLeague One wase-England, kugcine sekwenza abalandeli baleli qembu bazibuze baziphendule ngesimo sakhe benoNkanyiso Shinga naye ongakaze abonakale enkundleni. 

UChislett odlala eduze kwabagadli, ufike eNingizimu Afrika lilikhulu isasasa ngaye kwabasondelene neChiefs. Usayine inkontileka yeminyaka emibili.

Ngesikhathi uKaze ekhuluma nebezindaba emuva kokubambana neZamalek SC yase-Egypt emdlalweni ka-Group D weCaf Confederation Cup, wenabe ngobekwenzeka kuChislett.

“Emasontweni amabili adlule uChislett uziqeqeshe ngokugcwele neqembu okuyinto ejabulisayo kwazise ukulimala sekumphazamise kakhulu kusukela efikile,” kusho uKaze.

“Angikukhonzile ukuthuluma ngabadlali ngabodwana kodwa indaba kaChislett ike yasinika ubunzima kodwa konke sekuqondile. Izinsuku ezingu-10 ezedlule uzichithe nathi lapho besimakhela khona ukuthi alungele ukudlala noma nini uma igama lakhe limenyezwa.

“Wafika engenalutho, wathinteka ejimini. Kwathi ngesikhathi sekuthembisa waphinde washayeka kabi futhi khona ejimini. Kunesikhathi lapho emiswe kabi wukugula.

“Kumqoka nokutusa ukuzinikela kwethimba lodokotela beChiefs ngokuqinisekisa ukuthi uChislett useluleme ngokugcwele nanokuthi usekulungele ukwenza lokhu ayelandelwe khona.

“Sekukithina baqeqeshi ukuthi siyambophela yini koweChippa kodwa futhi nalapho okuningi kulele ekutheni sihlele ukuwudlala kanjani lo mdlalo wasekuhambeni ngoba siyazi ukuthi uzoba lukhuni."

IChiefs inethuba lokwengeza amaphuzu ayisithupha kwangu-22 enawo ngaphambi kokusonga unyaka. Ngemuva koweChippa, izosonga unyaka neTS Galaxy emdlalweni weligi ngeSonto ngo-3.30 ntambama eMbombela Stadium, eNelspruit.

Imidlalo yeBetway Premiership

Namuhla

Golden Arrows v AmaZulu (King Zwelithini Stadium, 7.30pm)

Kusasa

Siwelele v Mamelodi Sundowns (Dr Molemela Stadium, 7.30pm); Chippa United v Kaizer Chiefs (Nelson Mandela Bay, 7.30pm); Magesi v Sekhukhune United (Seshego Stadium, 7.30pm); Orbit College v Durban City (Olympia Park, 7.30pm); Stellenbosch v Polokwane City (Athlone Stadium, 7.30pm)