Isiyokha phesheya kwezilwandle iTLB yePirates

USETHOLE amadlelo aluhlaza phesheya kwezilwandle umdlali wasemuva we-Orlando Pirates, uMbekezeli Mbokazi.

Lo mdlali (20) usayiniswe yiqembu lase-United States elidlala kwiligi yakhona ephezulu iMajor League Soccer (MLS), iChicago Fire.

Womabili la maqembu akuqinisekisile lokhu izolo nokuthi usayine inkontileka ezophela ngo-2029, enombandela wokuthi iFire ingayenyusa ngomunye unyaka. Isamba semali athengwe ngaso uMbokazi asizange sidalulwe.

IFire iqede endaweni yesishiyagalombili kwi-log yeWestern Conference ngesizini ka-2025 esanda kusongwa, yakhishwa yiPhiladeplhia Union emzuliswaneni wokuqala wamaMLS Playoffs.

Umqeqeshi weFire uGregg Berhalter uthe bajabule ngokuthola omunye wabaddlali basemuva abasebancane abagqamile eNingizimu Afrika. 

"Yize esemncane kodwa usekhombise ukuqina ukhakhayi nokuba ngumholi ezingeni lamazwe ngamazwe. Silindele ukuthi asheshe afike enze umehluko eqenjini lethu nokuthi aqhubeke nokuthuthuka,” usho kanje uBerhalter kwi-website yeqembu.

UMbokazi ukhushulelwe eqenjini elikhulu lePirates ngoMashi nonyaka wangabe esabheka emuva.

Usedlale imidlalo engu-38 kweZimnyama emiqhudelwaneni ehlukene okubalwa kuyona iBetway Premiership, Nedbank Cup, Carling Knockout neCaf champions League, washaya amagoli amabili.

Ngonyaka odlule ubeseqenjini lesizwe lika-Under-20, Amajita, elinqobe iCosafa Cup. Udlale okokuqala eqenjini lesizwe elikhulu, iBafana Bafana, ngoMeyi nonyaka. Nakhona ufike kwezwakala njengoba esesikwatini esimenyezelwe ngumqeqeshi, uHugo Broos, esizodlala kwi-Africa Cup of Nations ezobanjelwa eMorocco kusukela ngoDisemba 21.

Kubhekwe ukuthi adlale okokugcina kwezikaMagebhula uma sezidudulana neMarumo Gallants kowamanqamu weCarling Knockout ngoMgqibelo ntambama.