Inhlese yegqubu kuCardoso noRulani koweCaf
URULANI Mokwena esaqeqesha iMamelodi Sundowns noMiguel Cardoso esapheka i-ES Tunis yaseTunisia
Image: BACKPAGEPIX
UNGENE ezintangeni umqeqeshi weMamelodi Sundowns, uMiguel Cardoso, ngesikhathi ebuzwa ngendaba esegudwini njengoba amaBrazilians elungela ukubhekana neMC Alger ephekwa nguRulani Mokwena onomlando nompetha baseNingizimu Afrika.
ISundowns eqale ngonyawo oluhle ku-Group C weCaf Champions League ngokunqoba kwiSaint Eloi Lupopo yaseDemocratic Republic of Congo (DRC), izobhekana ne-Alger yase-Algeria kusasa ngo-9 ebusuku e-Ali La Pointe Stadium, e-Algiers.
UCardoso nguyena owakhipha iSundowns kaMokwena emdlalweni owandulela owamanqamu weChampions League ngesizini ka-2023/2024 esaqeqesha i-Esperance Sportive de Tunis yaseTunisia.
Basabhekane kabili laba baqeqeshi emlandweni okwaba yimilenze emibili yomdlalo owandulela owamanqamu weChampions League eyanqotshwa wuCardoso ngo 1-0 eMzansi naseTunisia.
Kwale kancane ukuthi abhoke ngolaka uCardoso ngesikhathi abezindaba bembuza ngokubhekana kwakhe noMokwena owawina isicoco seligi ne-African Football League.
“Akukho okuyisipesheli ngalo mdlalo ngaphandle kokuthi umqoka njengayo yonke ngoba iwini yakhona izosinika amaphuzu amathathu azosibeka kahle eqoqweni,” kusho uCardoso.
Ukuqala ngebatha kwe-Alger eshaywe yi-Al Hilal yaseSudan ngo 2-1 ngeledlule kwenza uMokwena awadinge ngokuphindiwe amaphuzu uma uqhathanisa newini yeSundowns kwiLupopo.
“Iqiniso wukuthi uMokwena unomlando neSundowns kuphela kodwa akukho okunye okuthintekayo kulo mdlalo. Okungeke kushintshe yisibalo samaphuzu azotholwa yiqembu elizowina.
“Sihlele ukuqinisekisa ukuthi senza konke okusemandleni ukuthola amaphuzu agcwele ekuhambeni. Siyaqonda nokho ukuthi iqembu esiyobhekana nalo ngeke lisivumele ukuthi sizenzele noma yini esiyifunayo esibayeni salo,” kusho uCardoso.
Ngesizini edlule iSundowns iphelele kowamanqamu weChampions League lapho igotshwe khona yiPyramids FC yase-Egypt ngaphansi kwesandla sikaCardoso.
Nakuba kunengxenye yabalandeli beSundowns esakhala ngoCardoso ngokuyeka ithuba ngesizini edlule kodwa lo mqeqeshi wasePortugal unethuba lokujika lezo zinkulumo ngokudla lesi sicoco esesihlule iSundowns iminyaka ecela kwengu-10.