IPirates ivale igebe kwiDowns inqoba kwiChippa
U-EVIDENCE Makgopa obe ngelinye lamaqhawe e-Orlando Pirates ngesikhathi inqoba kwiChippa United emdlalweni weBetway Premiership e-Orlando Stadium izolo ebusuku
Image: BACKPAGEPIX
Orlando Pirates (0) 2
Chippa United (0) 0
UKUSABALALA kwezindaba zokuhamba kwesitobha se-Orlando Pirates, uMbekezeli “TLB” Mbokazi, kuliveze obala ivangeli elihlala lishunyayelwa ngumqeqeshi waleli qembu laseSoweto, u-Abdeslam Ouaddou, ngokubaluleka kokuhlala belungile abadlali abangajwayele ukuqala imidlalo.
La mazwi uphinde wawakhipha u-Ouaddou ngaphambi kokubhekana neChippa United abayiphuce amaphuzu kwiBetway Premiership izolo ebusuku e-Orlando Stadium, eSoweto.
Esikimini sePirates uqalise uLebone Seema-ojwayele ukudlala noMbokazi noNkosinathi Sibisi maphakathi emuva kwiPirates. USeema uqale endaweni kaMbokazi kodwa obekufakazela okuhlale kushiwo ngu-Ouaddou wukubonakala kuka-Olisa Ndah ebhentshini.
IPirates ezisondeze nesicongo se-log ngalo mphumela inqobe ngamagoli ka-Evidence Makgopa no-Oswin Appollis abebesanda kungena.
Lo mphumela ulinganise ngamaphuzu (25) iPirates neMamelodi Sundowns eqhwakele. Ezimnandi kwiPirates ngezithi isasele ngomdlalo kwiSundowns ematasa nemidlalo yeCaf Champions League.
“Kusukela ngafika kwiPirates ngihlale ngikubalula ukuthi mabahlale belungile abadlali abangajwayele ukuqala imidlalo,” kusho u-Ouaddou kwiSuperSport.
UMbokazi (19) okhonjwa kwiChicago Fire FC edlala kwiMajor Soccer League (MLS) ubewubuka nabalandeli umdlalo wayizolo ebusuku.
“Bonke abadlali bePirates bazolithola ithuba labo. Ukuthi lizovela kanjani akekho owaziyo. Okumqoka wukuthi bonke laba abangajwayele ukuqala imidlalo bahlale belungile,” kusho u-Ouaddou.
Njengoba bekulindelekile, umdlalo uthe uqala nePirates yaqala yangena iphindelela emapalini eChippa abevalwe nguDumisani Msibi kwazise ubengekho uStanley Nwabalai olimele.
Nakuba bekusobala ukuthi iPirates iyazenzela kodwa kudlalwe kwaze kwayiwa ekhefini womabili amaqembu esagingqa amaqanda.
Kuhambe ngendlela efanayo nakwesesibili. Yize bekunjalo kodwa iChippa ibilokhu iyikhumbuze njalo iPirates ngobungozi bayo ngejubane likaBienvenu Eva Nga.
Kugcine kuqondile kwiPirates ngomzuzu ka-75 kulandela ingcwenga yephasi kaRelebohile Mofokeng kwavela igoli likaMakgopa obesanda kungena endaweni kaYanela Mbuthuma.
Ngomzuzu wokugcina, u-Appollis ushayelele isipikili sokugcina eshaya igoli elimshiye emile uMsibi.