IChiefs iyiqale ngesibhaxu eyamaqoqo kwiCaf

IKAIZER CHIEFS iyiqale kabi imidlalo yesigaba samaqoqo kwiCaf Confederation Cup ikhaa ngaphansi kwi-Al Masry yase-Egypt eSuez Sadium, e-Egypt, ngeSonto ebusuku.

I-Al Masry ibekwe phambili nguBonheur Mugisha esiwombeni sesibili ngaphambi kokuthi uDillan Solomons ashayele Amakhosi elokulinganisa. UMohamed Hashem ushayele leli qembu lase-Egypt igoli lokuwina umdlalo usuyophela.

Ukwehlulwa kweChiefs emdlalweni wokuqala wesigaba samqoqo kuyifaka ingcindezi yokuqinisekisa ukuthi iqoqa amaphuzu emidlalweni elandelayo ukuze izozibeka ethubeni lokubalwa namaqembu amabili azoqeda phezulu kuGroup D adlulele kuma-quarterfinal. NgeSonto Amakhosi azokwamukela elinye iqembu lase-Egypt, iZamalek, emdlalweni wesibili wesigaba samaqoqo. KuGroup D kukhona neZesco United yaseZambia engenawo umlando wokuhamba ibanga elinde emiqhudelwaneni yeCaf.

Emdlalweni weMasry, iChiefs iqale umdlalo izama ukuthola igoli kuqala kubhoke uMduduzi Shabalala, Pule Mmodi no-Etiosa Ighodaro kodwa yagcina ingaphumelelanga. Kwesesibili, ibuye isicindezela kodwa kube yiMasry ethole igoli obekuyiphenathi edaleke emuva kokuthi unozinti weChiefs, uBrandon Petersen edlalise kabi ebhokisini umdlali waleli qembu elisendaweni yesihlanu kwi-Egyptian Premier League. UMugisha uyibeke phakathi. IChiefs ithole isixazululo sekungene uMfundo Vilakazi oyenze yahlasela ngamandla. Lo mdlali uphasele uSolomons ibhola alithathe waqonda nalo ezitobheni seMasry, wagcina elibeka phakathi. Leli goli libukeke liwanika isibindi nokuzethemba Amakhosi. Nokho kushabalale konke ngesikhathi uHashem eshayele iMasry igoli lesibili. 

IChiefs ihlalelwe wumsebenzi wokuvuka izithathe uma isibhekene neZamalek phambi kwabalandeli bayo eMzansi ngempelasonto.