IDowns inqobe iLupopo yaqhwakela koweCaf

IMamelodi Sundowns izibeke esicongweni kuGroup C iguqisa iSaint-Eloi Lupopo yaseDemocratic Republic of Congo ngo 3-1 emdlalweni wayo wokuvula isigaba samaqoqo eLoftus Versfeld ngoMgqibelo ntambama.

UNuno Santos ushaye amagoli amabili ngokwehlukana kweziwombe, elinye laqhamuka kuMarcelo Allende kwesesibili.

Igoli leLupopo lishaywe nguRamot kashala sekuyophela isiwombe sokuqala.

AmaBrazilian ahambe phambili ngomzuzu wesine ngesikhathi uSantos elibeka phakathi ngebatha ephambi kukanozinti kulandela iphasi enhle eqhamuke kuMiguel Reisinho.

Nokho, kuyiwe ekhefini sezibambene ngo 1-1 kulandela igoli elishaywe nguKashala eseduze esikhathini esengezwe ngunompempe.

AmaSandawana aqhubekile nokuphatha umdlalo esiwombeni sesibili, aphinde ahamba phambili ngomzuzu ka-61 ngomgundatshani kaMarcelo Allende.

USantos uthole igoli lesibili ngomzuzu ka-78, engqofela phakathi ibhola ebeligotshwe ngu-Arthur Sales.

Ukunqoba ngalolu hlobo kubeke iqembu likaMiguel Cardoso esicongweni eqoqweni lalo ngamaphuzu amathathu.

Lilandelwa yi-Al Hilal yaseSudan nayo enamathathu ngemuva kokunqoba iqembu likaRhulani Mokwena, iMC Alger, ngo-2-1 eKigali, eRwanda, ngoLwesihlanu.

I-Alger isisendaweni yesithathu ngeqanda kanti iLupopo isihlezi emsileni, nayo ngeqanda.

ISundowns izodlala olandelayo weChampions League neMC Alger e-Algeria ngoLwesihlanu.