IBarca ethubeni lokugubha ukubuyela eCamp Nou ngewini
UMGADLI weBarcelona uRobert Lewandowski obuye ekulimaleni washayela leli qembu amagoli amqoka
Image: FACEBOOK / FC BARCELONA
IBARCELONA izobuyela eCamp Nou namuhla ntambama ngenhloso yokugubha lesi sigaba esimqoka ngokuthola amaphuzu amathathu azoyibeka esicongweni seLa Liga.
Leli qembu likuqinisekisile maphakathi nesonto ukuthi umdlalo weligi wanamuhla elizowudlala ne-Athletic Bilbao uzodlalelwa ekhaya lalo ngemuva kokuthola imvume eligunyaza ukuthi selingaqala ukulisebenzisa.
Lo mdlalo ozoqala ngo-5.15 ntambama kuzoba ngowokuqala weBarcelona eCamp Nou selokhu yagcina ngoMeyi 2023.
Sekuphele iminyaka emibili nezinyanga eziyisithupha isebenzisa i-Estadi Olímpic Lluís Companys ngenxa yokuthi bekusha ipiki nefosholo eCamp Nou, kulungiswa le nkundla.
IBarca isendaweni yesibili kwi-log yeLa Liga ngamaphuzu angu-28 emidlalweni engu-12. IReal Madrid iqhwakele ngamaphuzu angu-31 kodwa umdlalo olandelayo ne-Elche CF izowudlala kusasa ngo-10 ebusuku.
Lokhu kuchaza ukuthi uma iBarca inganqoba kusihlwa ingazibeka esicongweni, iphinde yandise ingcindezi ezimbangini zayo.
IBilbao, esendaweni yesikhombisa ngamaphuzu angu-17, ingakwazi ukumosha umcimbi namuhla, kodwa umlando awulivuni leli qembu elisuka esifundeni saseBasque.
Alikaze layinqoba iBarca kusukela ngo-Agasti ka-2019 kanti lagcina ukuyishayela eBarcelona ngoNovemba ka-2001.
USAQHUBEKA umsebenzi enkundleni yeBarcelona, iCamp Nou, ezoqala ukuyisebenzisa namuhla
Image: FACEBOOK / FC BARCELONA
Nakuba umsebenzi usaqhubeka eCamp Nou kodwa abalandeli abangu-45 400 abazovunyelwa ukuthi bangene bazofica sezikhona izinguquko eziningi okubalwa kuzona izindawo zokungena, izindawo okuhlala kuzona abakhubazekile, amagumbi okushintshela, umhubhe abadlali abangena kuwona nokunye.
Lo msebenzi kubhekwe ukuthi uphothulwe ngoJuni ngonyaka ozayo kanti kulindeleke ukuthi imali ezosetshenziswa ifinyelele ku-1.5 billion wama-Euro, okuyimali elinganiselwa ku-R29.81 billion.
IReal Madrid isebenzise cishe u-1.7 billion wama-Euro (R33.78 billion) ngesikhathi ilungisa inkundla yayo, iSantiago Barnabeu, kusukela ngo-2019 kuya ku-2024. Le nkundla isiyindawo eseqophelweni eliphezulu esingatha imidlalo ehlukene, amakhonsathi neminye imicimbi.
NgeSonto bekunabalandeli abangaphezu kuka-78 000 kule nkundla abebezobukela umdlalo we-American Football phakathi kwamaqembu amabili ase-United States adlala kwi-NFL, iMiami Dolphins neWashington Commanders.
Okuhle ngeBernabeu wukuthi isebenzisa ubuchwepheshe obukwazi ukususa utshani okudlalelwa kubona ibhola, buyopakishwa ngaphansi kwenkundla, kulethwe obunye obungasetshenziselwa eminye imidlalo, noma kufakwe iziteji zamakhonsathi.
Lokhu kuqinisekisa ukuthi inkundla iyaqhubeka nokukhiqiza imali ngaphandle kokuphazamisa lapho iqembu kufanele lidlalele khona.
Yize kusazothatha isikhathi ukuthi iCamp Nou ifike kulelo zinga, kodwa ukuvulwa kwayo sekubuyise ithemba kubalandeli nakosomabhizinisi abakhelene nale nkundla.