IDowns nethuba lokuphindiselela iPirates kwiLupopo
ABADLALI beMamelodi Sundowns bejabulela elinye lamagoli emzuliswaneni wokugcina wokuhlungela iCaf Champions League bedlala neRemo Stars
Image: BACKPAGEPIX
IMAMELODI Sundowns ingafundisa iSaint-Eloi Lupopo yaseDemocratic Republic of Congo isifundo njengoba bezobhekana emdlalweni wokuvula isigaba samaqoqo eCaf Champions League eLoftus Versfeld ngoMgqibelo ngo-3 ntambama.
ILupopo iyona eqede amathuba ePirates okungena esigabeni samaqoqo ikhipha leli qembu lase-Orlando emzuliswaneni wokugcina wokuhlunga.
Umlenze wokuqala owawuseLubumbashi wanqotshwa yiLupopo ngo 3-0. IPirates yabuya ngawo u 3-0 kowesibili e-Orlando Stadium kodwa yakhala ngaphansi ngo 5-4 sekukhahlelwa amaphenathi.
Ezimnyama zibe sezifaka izikhalo kwiCaf, zisola iLupopo ngokusebenzisa umqeqeshi uGuy Bukasa ekubeni ayemiswe yile nhlangano ngoSepthemba, zaphinde zakhala ngokubhaliswa kwabadlali ababili.
ICaf izichithile zontathu lezo zikhalo, iveza ukuthi abadlali babhaliswe ngendlela, nokuthi uBukasa umiswe emidlalweni ethinta iqembu lesizwe laseDRC lika-Under-20 abeliqeqesha phambilini.
Ibe isihlawulisa iPirates ngokwehluleka ukunikeza ithimba leLupopo amakhadi awangunyaza ukuthi angene ezindaweni ezithile enkundleni kanye nokufutha amakhemikhali engunjini lokushintshela elalisetshenziswa yileli qembu e-Orlando.
Amanye amaqembu iSundowns ezobhekana nawo kuGroup C yi-Al Hilal yaseSudan neMC Alger yase-Algeria, ecijwa ngowake waqeqesha iPirates neSundowns, uRhulani Mokwena.
Ngesizini edlule i-Al Hilal neMC Alger bafinyelele kuma-quarterfinal kwiChampions League, iSundowns yanqotshwa kowamanqamu.
Ekhuluma neSouth African Football Journalists Association, UMokwena uthe kufanele bayigade iLupopo, nakuba ingenawo amava alingana nalawa amanye amaqembu amathathu kuleli qoqo.
“Akukuningi okukhulunywayo ngeLupopo kodwa ngicabanga ukuthi imidlalo emibili esizoyidlala nayo ibalulekile kula maqembu amathathu wonke umuntu akhuluma ngawo. Ikhiphe iPirates, futhi siyazi ukuthi iPirates iqine kanjani kule sizini,” kusho uMokwena.
“Ishaye iPirates ngamagoli amaningi eCongo futhi ngawubuka umdlalo abawudlale e-Orlando. Kuzoba nzima ukudlala nabo. Baqeqeshwa kahle, banamandla nesivinini, ikakhulukazi phambili.”
ILupopo izongena emdlalweni wangoMgqibelo engekho umdlali wasemuva uDieumerci Mukoko, owazakhela igama kuleli ngemigilingwane ayeyenza bedlala nePirates.
Lo mdlali umiswe yiCaf ngenxa yezenzo zakhe ezingezinhle kulo mdlalo. Nakuba unompempe engazange abone ngesikhathi umdlalo uqhubeka, kodwa ama-video asabalala ezinkundleni zokuxhumana emkhombisa edlalisa kabi abadlali beZimnyama.
ISundowns ixebule iRemo Stars yaseNigeria ngo 7-1 uma sekuhlanganiswe imilenze yomibili emzuliswaneni wokugcina wokuhlungela iChampions League.