Isethenjwa seStellies nejoka lokuziba amadlelo aluhlaza
NGU-DEVON Titus weStellenbosch FC osedlalele leli qembu laseKapa imidlalo engu-150 kuyona yonke imiqhudelwano.
Image: BACKPAGEPIX
UKUBONA ozakwabo bakudala beqhakaza emaqenjini ahlukene akumdikibalisi, uDevon Titus, weStellenbosch FC kepha kumkhumbuza ngejoka elisemahlombe akhe lokuqinisekisa ukuqhubeka nokukhula kwaleli qembu laseKapa.
UTitus (24) ubekhuluma nethimba labezindaba leStellies njengoba izodlala umdlalo wokuqala ka-Group C weCaf Confederation ne-AS Otoho yaseCongo-Brazzaville, ngeSonto ngo-3 ntambama, ePeter Mokaba Stadium, ePolokwane.
Kulo mqhudelwano iStellies ihambisana neKaizer Chief, bese kuthi kwiCaf Champions League uMzansi umelwe yiMamelodi Sundowns.
Womathathu la maqembu azoqala imidlalo yamaqoqo ngokwahlukana kule mpelasonto ezinkundleni ezahlukene.
Kubhekwe lukhulu nakule sizini kuTitus obengomunye wabebegqamile kwiStellenbosch ngesizini edlule, ngesikhathi ifinyelela kowandulela owamanqamu.
Nakuba leli qembu selishiywe ngabadlali abamqoka okukhona kubona uSihle Nduli noDeano van Rooyen (Pirates, Sibongiseni Mthethwa no-Ashley du Preez (Chiefs), Jayden Adams noFawaaz Basadien (Sundowns).
UTitus ungumdlali wesithathu emlandweni weStellies odlale imidlalo ewu-150 kuleli qembu.
Usele kuVan Rooyen ngemidlalo engu-11, ushiywa ngemihlanu nguSage Stephens.
“Ngizizwa ngihloniphekile ngokufika kulesi sibalo semidlalo kwiStellenbosch futhi ngikhulekela ukuthi ngiqhubeke ngiyandise futhi ngisize iqembu lifeze izifiso zalo,” kusho uTitus.
Lo mdlali ofike enkulisa yeStellies ngo-2020, waphenduka ukaputeni weDStv Diski Challenge (DDC) emuva kweminyaka emibili, nguyena omncane kunabo bonke ofuke kulesi sibalo semidlalo.
KwiDDC wafika khona wadla izicoco ezimbili okukhona kuzona nesePremier League Next Generation Cup eyayise-England.
“Kuliqiniso ukuthi abalingani bami bakudala bayaqhakaza kwamanye amaqembu kodwa lokhu akusho ukuthi kufanele ngihale.
“Kwangilimaza ukuhamba kukaDeano (Van Rooyen) ngoba nguyena owayengibamba ngesandla angicathulise kokuningi kodwa futhi kwangikhumbuza ubumqoka bokuzinza ukuze iqembu lingeke libuyele lapho elisuka khona.
“Siqale kabi kule sizini kodwa akukafiki lapho kufanele sixhamazele khona,” kusho uTitus.