UNcikazi utuse u-Ouaddou ngobumbano kwiPirates

IPHINI lenhloko yabaqeqeshi kwi-Orlando Pirates, uMandla Ncikazi, alingabazi ukuthi banawo amava okuqukula isicoco sesibili ezinyangeni ezintathu yize owamanqamu weCarling Knockout beqale ukuwuhlelela ngaphandle kwenqwaba yabadlali abebekwiBafana Bafana.

IPirates ibalwa namaqembu ayiqale kahle isizini yeBetway Premiership okufakazelwa wukuhlala kwayo endaweni yesibili kwi-log. lsele ngamaphuzu amathathu kwiMamelodi Sundowns esesicongweni. 

Ngaphandle kweligi, eZimnyama sezivikele ngempumelelo indebe yeMTN8 eziyiqukule emuva kokuguqisa iStellenbosch ngo 3-1 kowamanqamu eMbombela eMpumalanga.

IPirates inethuba lokwengeza ngeyeCarling Knockout ezoyibanga neMarumo Gallants okuyiqembu afikela kulona umqeqeshi weBucs, u-Abdeslam Ouaddou. Umdlalo uzoba ngoDisemba 6.  

Ekhuluma emcimbini wokuqwashisa ngesifo sikashukela (World Diabetes Day) iPirates ebiyingxenye yawo muva nje eGoli, uNcikazi uthe konke kusemgqeni ukuthi baphinde bavalele okuthile ekhabetheni lezinkomishi.

“Konke ebesifisa ukukwenza sikwenzile kulezi zinsuku ezedlule yize kunzima ukuziba ukuthi kunenqwaba yabadlali bethu ebingekho iyomela iBafana,” kusho uNcikazi.

Abadlali bePirates abebekwiBafana edlale neZambia; nguSipho Chaine, Nkosinathi Sibisi, Mbekezeli Mbokazi, Masindi Nemtajela, Thalente Mbatha, Sipho Mbule, Tsepang Moremi, Oswin Appollis no-Evidence Makgopa. UDeon Hotto ubekweseNamibia.

“Kasinawo uphawini wokucasha ngesithupha kwiPirates ngakho-ke laba abebekhona bebesebenza sangathi yibona vele abajwayele ukuqala imidlalo.

“Ngalokhu ngitusa umqeqeshi (u-Ouaddou) ngokufika namaqhinga amaningi nahlukene agcina abadlali bekhuthazekile futhi bezimisele ngokusebenzela phezu kwawo.

“Amathuba ethu okudla isicoco sesibili sesizini zingakapheli izinyanga ezine akhona futhi siyaqonda ukuthi kukithina ukuthi senzani ngawo.

“Kasikho isikhathi sokukhononda kwiPirates. Abaphathi bayo bazi ukuthi bonke abadlali abasemabhukwini bayafana ngakho-ke ukuthi kukhona abebengekho ngenxa yeBafana yinto engeke ishintshe lutho.

“Sineme ngendlela izinto ezihamba ngayo eqenjini. Sijabule futhi ngokufaka isandla ukusiza iqembu lesizwe kodwa okusemqoka kunakho konke wukuthi sanelisekile ngezinga labo bonke abadlali abasemabhukwini ePirates okufakazelwa wukusebenza ngaphandle kwenkinga yize kukhona abaningi abebengekho."

Ngaphambi komdlalo wamanqamu weCarling, iPirates izobhekana neChippa United (Novemba 25 ekhaya neDurban City (Novemba 29) eMoses Mabhida Stadium, eThekwini.