Abakuleli ethubeni lemiklomelo yeCaf

BAYISITHUPHA abaseNingizimu Afrika abasethubeni lokubuya nezindondo emcimbini wemiklomelo weConfederation of African Football, amaCaf Awards, azobanjelwa eMorocco NgoLwesithathu. 

Le nhlangano eyengamele ibhola e-Afrika izoklomelisa abadlali, abaqeqeshi namaqembu avelele kulo nyaka emcimbini ozoqala ngo-8 ebusuku edolobheni iRabat.

Ukaputeni weBafana Bafana neMamelodi Sundowns, uRonwen Williams, ukwabathathu abazobanga indondo yeCaf Goalkeeper of the Year. 

Uzoqhudelana nonozinti weMorocco neRS Berkane, uMunir Mohamedi, noYassine Bounou ovimbela iMorocco ne-Al Hilal yaseSaudi Arabia.

UWilliams uyiwinile le ndondo nyakenye, ehlula u-Andre Onana waseCameroon noYahia Fofana wase-Ivory Coast.

Unozinti weBanyana Banyana neMamelodi Sundowns Ladies, u-Andile Dlamini, uqokelwe umklomelo we-Women’s Goalkeeper of the Year. 

UDlamini wawuthatha lo mklomelo ngo-2022. Indondo uzoyibanga noKhadija Er-Rmichi waseMorocco noChiamaka Nnadozie waseNigeria. 

Umdlali osemncane weqembu lesizwe lika-Under-20, uTylon Smith, ogijima kwiQueens Park Rangers yase-England, uqokelwe umklomelo weCaf Young Player of the Year.

Ngokokuqala ebonakala ohlwini olufushane lwemiklomelo yeCaf. Uqokwe njengomdlali ovelele ngesikhathi Amajita enqoba isicoco se-Africa Cup of nations ka-Under-20 ngo-Ephreli kuya kuMeyi. 

Uzoqqhudelana nabadlali baseMorocco u-Abdellah Ouazane no-Othmane Maamma.

ISundowns iyona kuphela iqembu laseMzansi elingenile ohlwini lokugcina lwamaqembu asemunxeni weCaf Club of the Year ngemva kokuthi i-Orlando Pirates neStellenbosch FC besale endleleni.

AmaSandawana afinyelela kowamanqamu weCaf Champions League ngesizini edlule, azobanga nompetha balowo mqhudelwano iPyramids FC yase-Egypt, nompetha beConfederation Cup iRS Berkane yaseMorocco.

Abanye abadlali ababili bakuleli abasethubeni lokuthola imiklomelo ngumdlali weBanyana Banyana, uRefiloe Jane noweBafana Bafana uNdabayithethwa Ndlondlo. Bobabili baqokelwe oweCaf Goal of the Year.

UJane uqokelwe i-freekick enhle ayinamathisela enethini bedlala ne-Mali kwi-Women’s Africa Cup of Nations, kanti uNdlondlo ufakwe ngenxa yegoli alishaya ekude bedlala ne-Uganda emdlalweni we-African Nations Championship (Chan).